Har bir kishi o‘qib yurishi tavsiya etiladigan duolar;
Anas (roziyallohu anhudan rivoyat qilinadi: “Rasululloh (sollallohu alayhi va sallam)ning ko‘p o‘qib yuradigan duolari:
«Allohumma atina fid-dunya hasanatav vafil axirati hasanatav vaqina ’azaban-nar» edi.
(Ma’nosi: Parvardigoro, bizga bu dunyoda ham yaxshilikni ato qil, oxiratda ham yaxshilikni ato et va bizni do‘zax azobidan asra.)
Imom Buxoriy va Muslim rivoyati.

Ibn Mas’ud (roziyallohu anhu)dan rivoyat qilinadi: Rasululloh (sollallohu alayhi va sallam): «Allohumma inniy as’aluka huda vattuqo val ’afofa val g‘ina», - deb aytardilar.
(Ma’nosi: Ey Alloh, sendan hidoyat, taqvo, iffat, va boylik so‘rayman).
Imom Muslim rivoyati.

Abdulloh ibn Amr ibn Oss (roziyallohu anhu)dan rivoyat qilinadi: Rasululloh (sollallohu alayhi va sallam): «Allohumma ya musorrifal qulub sorrif qulubana ’ala to’atika», deb aytardilar.
(Ma’nosi: Ey Alloh, qalblarni aylantiruvchi zot, qalbimizni toating tomoniga aylantir).
Imom Muslim rivoyati.

Oysha (roziyallohu anho)dan rivoyat qilinadi: Rasululloh (sollallohu alayhi va sallam) mana bu kalimalar bilan duo qilardilar: «Allohumma inniy a’zubika min fitnatin nari va a’zobannari va min sharril g‘ina val faqri»
(Ma’nosi: Allohim do‘zax fitnasidan, do‘zax azobidan, boylik va kambag‘allikning yomonligidan Sendan panoh tilayman.)
Abu Dovud Termiziy, Nasaiy, va Ibn Mojalar sahih isnod bilan rivoyat qilgan.

Sa’d ibn Abu Vaqqos (roziyallohu anhu)dan rivoyat qilinadi: Rasullulloh (sollallohu alayhi va sallam): «Katta baliqning qornida Rabbilariga iltijo qilgan Zinnunning (Yunus alayhissalom) duolari: «Laa ilaha illa anta subhanaka inniy kuntu minaz zolimin», edi. Biror musulmon kishi mana shu kalimalar ila duo qilsa, ijobat etiladi», - dedilar.
(Ma’nosi: Sendan boshqa iloh yo‘q. Seni poklab yod eturman. Albatta men zolimlardan bo‘ldim).

Alloh barchalarimizni mushkullarimizga o‘zi najot bersin. Omin.

O‘MI matbuot xizmati