Xalqimiz doimo xursandchilik bilan nishonlaydigan bayramlaridan biri – Qurbon hayitidir. Bayram kunlari xalqimizga xos bo‘lgan saxovat va muruvvatdek oliyjanob fazilatlar yanada bo‘y cho‘zadi. Odamlar o‘rtasida mehr-oqibat, yaxshilik, sila rahm kuchayadi. Ajdodlardan o‘tib kelayotgan bir qator diniy va milliy qadriyatlarimiz, shubhasiz, ana shu bayram kunlari insonlar hayotida namoyon bo‘ladi.

Bu yil Qurbon hayiti koronavirus pandemiyasi davriga to‘g‘ri kelgani ushbu bayram shukuhiga ta’sir ko‘rsatmadi, aksincha, odamlarimiz o‘z uylarida, oila-a’zolari bilan bayramni nishonladilar. Ezgu duolar qilindi. Yoshu kattalar ma’rifiy suhbatlar qilib, ushbu bayramning ahamiyati, hayotimizda tutgan o‘rni haqida tushunchalar berdilar.

Muhtaram Prezidentimizning Farmonlari asosida koronavirus pandemiyasiga qarshi kurash, aholining sanitariya-epidemiologik osoyishtaligi va salomatligini saqlashda fidoiylik ko‘rsatayotgan xodimlarga bir martalik moddiy yordam ko‘rsatish uchun 100 mlrd so‘m ajratilishi, Tabrikka asosan, ko‘makka muhtoj aholi qatlamini qo‘llab-quvvatlash maqsadida avval ajratilgan 10 trln. So‘m mablag‘ga qo‘shimcha ravishda respublika budjetidan yana qariyb 2.5 trln. So‘m mablag‘ yo‘naltirilgani juda katta xursandchilik bo‘ldi.

Albatta, bugun hukumatimiz tomonidan ushbu kasallikni yengish bo‘yicha barcha ishlar olib borilmoqda. Ushbu kasallikni bartaraf etish bo‘yicha jalb qilingan har bir inson e’tibor va ehtiromda.

Muborak Qurbon hayiti kunlarida hammamiz ne’matlarga shukr qilib, sabr-qanoat bilan Yaratgandan yurtimizga tinchlik, osoyishtalik so‘rasak, kasallikka qarshi kurashda birinchi safda turib xizmat qilayotgan shifokorlarni haqiga ko‘proq duo qilsak, Alloh qabul qiladi, inshoalloh.

Shamsuddin BAUATDINOV,

Qoraqalpog‘iston musulmonlari qoziyoti qozisi