Bugun, 26 iyun kuni Qirg‘iziston musulmonlari idorasi raisi, muftiy Maqsadbek Toktamushev boshchiligidagi bir guruh mutasaddilar Farg‘ona viloyati So‘x tumaniga tashrif buyurdilar. Mehmonlarni O‘zbekiston musulmonlari idorasi raisi, muftiy Usmonxon Alimov hazratlari va Din ishlari bo‘yicha qo‘mita raisi Abdug‘ofur Ahmedov kutub oldi.
Kunning birinchi yarmida ikki davlat ulamolari ishtirokida “Dinimiz va mazhabimiz birligi yo‘lida birdam bo‘laylik” mavzusidagi davra suhbati bo‘lib o‘tdi.
Muloqotda muftiy Usmonxon Alimov hazratlari mazhabga ergashish birlik ramzi ekani, mo‘min-musulmonlarning ittifoqligini mustahkamlashni alohida ta’kidladilar. Shuningdek, dini mubinimizda qo‘shni haqlariga rioya qilish muhimligi, mehr-oqibat rishtalarini yaxshilashda qo‘shnilarning o‘rni beqiyos ekani haqida to‘xtaldilar. Qur’oni karimni mahkam tutsak, mo‘min-musulmon ekanimizni unutmasak, hech qachon oramizga begona kuchlar kirolmaydi. Chunki musulmon odam o‘z dindoshiga faqat yaxshilikni ravo ko‘radi, deya muftiy hazratlari o‘z so‘zlarini yakunladilar.
Davra suhbatida Din ishlari bo‘yicha qo‘mita raisi Abdug‘ofur Ahmedov, Qirg‘iziston musulmonlari idorasi raisi, muftiy Maqsadbek Toktamushev, Islom sivilizatsiyasi markazi direktori o‘rinbosari Shayx Abdulaziz Mansur va bir guruh mutasaddilar ma’ruza qildilar.
So‘zga chiqqan notiqlar qo‘shnilarning millati va irqiga qaramasdan ularga yaxshilik qilishga buyurilgani, qo‘ni-qo‘shnilarga ozor bermaslik, hurmatlarini saqlash zarurligi, qo‘shnilari bilan tinch-totuv yashagan, ularga ozor bermagan odam katta baxt-saodatga erishishi, aksincha, yomon munosabatda bo‘lish esa, xunik oqibatlarga olib kelishi to‘g‘risida so‘z qildilar.
Qo‘shni haqlarini ado etish o‘zaro mehr-muhabbatning oshishi, tinchlik, hotirjamlikning mustahkamlashishiga zamin yaratadi. Xalqimizda “qo‘shning tinch sen tinch” degan maqol bejizga aytilmagan. Agar ikki yurt vakillari o‘zaro hamjihat bo‘lib, dinimiz ko‘rsatmalariga amal qilsalar nafaqat savob oladilar, balki bir qancha yutuqlarga ham erishishlari mumkin.
Muloqot va uchrashuvlar davom etadi.

O‘zbekiston musulmonlari idorasi Matbuot xizmati