Qadr kechasidagi onlayn Qur’on xatmonasiga marhabo!
Ramazon oyining bezagi bo‘lmish Qur’oni karimni xatm qilish o‘lkamizda go‘zal an’anaga aylangan. Allohning kalomi qalblarga shifo, dillariga surur, ruhlariga quvvat bag‘ishlaydi. Yurtimizda shahri Ramazonning har oqshomida Ilohiy kalom sadolari yangramoqda.
Shu yil 20 aprel kunidagi Prezidentimizning “Muborak Ramazon oyini munosib tarzda o‘tkazish to‘g‘risida”gi qarori asosida onlayn Qur’oni karim tilovatlari tashkil etilishi elimizni cheksiz xursand qildi.
Ulug‘ oy davomida diyorimizda eng xushovoz qorilar onlayn xatmi Qur’onlarni o‘qidilar. Internet saytlari va ijtimoiy tarmoqlar orqali qorilar qiroatlarini yurtimiz ahli diqqat bilan tingladi.
Shunday onlayn xatmi Qur’onlarning yakuni va xatmona duosi 2020 yil 19 may (Qadr kechasi) kuni soat 22:15 da jonli efirda uzatilishi rejalashtirildi. Xatmona tadbiri internet saytlari, ijtimoiy tarmoqlar orqali onlayn namoyish etiladi. Shuningdek, ushbu tadbir “Uzreport” telekanalida to‘g‘ridan to‘g‘ri, qolgan kanallarda esa yozib olingan holda efirga beriladi.
Mana shunday xatmi Qur’onlar fayzu barakasidan butun dunyoga, xususan, yurtimizga qut-baraka insin, baloyu ofatlar daf bo‘lsin, deb iltijolar qilamiz.
Qadr kechasidagi onlayn Qur’on xatmonasiga marhabo, aziz yurtdoshlar!
MuslimTV - https://www.youtube.com/channel/UCLbdL0ibb4zqlqe7LRNOSNQ
Uzreport - https://uzreport.news/live
O‘zbekiston musulmonlari idorasi Matbuot xizmati
Bir marta "Subhanalloh" deyish uchun fursat berilsa...
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
O‘lim bir eshik. Barcha insonlar undan o‘tadi. Eh koshki, bu eshikka kirgandan keyin mening uyim qanaqaligi ma’lum bo‘lsa?!
Birodar! Qarang, qabrdagilar bir-birlariga juda yaqin yotishibdi. Lekin ular sirtdan yaqin qo‘shni. Aslida esa, bir-birlarining yoniga ham bora olmaydilar.
Usmon roziyallohu anhu qachon qabr yonidan o‘tsalar, shu darajada yig‘lar edilarki, soqollari ko‘z yoshlaridan ho‘l bo‘lib ketardi.
U kishidan: "Siz nega jannat va do‘zaxni esga olganingizda yig‘lamaysiz. Lekin qabrni ko‘rib yig‘laysiz?" deb so‘rashdi. U kishi shunday dedilar: «Rasululloh sollallohu alayhi vasallam: "Qabr oxiratning ilk manzilidir", deganlar. Shunga ko‘ra, agar mayyit qabrdagi azobdan najot topsa, undan keyingi hayot oson bo‘ladi. Agar qabrdagi azobdan najot topa olmasa, u holda undan keyingi hayot qiyin bo‘ladi.
Yana Rasululloh sollallohu alayhi vasallam: "Men qabrdan ko‘ra daxshatliroq biror manzarani ko‘rmadim", deganlar.
Biz uchun bu qabrlarda ibrat yo‘qmi? Qarang, boy ham, faqir ham, zo‘ravon ham, kuchsiz ham, oq tanli ham, qora tanli ham, podshoh ham, fuqaro ham barcha barobar yotibdi. Ular dunyoga qaytishni xohlaydilar. Boylik jamlash yoki qasr qurish uchun emas, balki, koshki men bir namoz o‘qish uchun muhlat topsam, koshki bizga bir martagina "Subhanalloh" deyish uchun fursat berilsa, deb, shu amallarni qilish uchun dunyoga qaytishni xohlaydilar. Lekin endi iloji yo‘q. Nomai a’mol yopilib bo‘ldi. Ruh jismdan chiqqan. Hayot muhlati tugab bo‘lgan. Endi har bir mayyit o‘z amalining garovi o‘laroq qabrida yotibdi...
«Nasihatlar guldastasi» kitobidan