Bismillahir Rohmanir Rohiym

Alloh taologa beadad hamdu sanolar, Rasululloh sollallohu alayhi vasallamga durudu salavotlar bo‘lsin.

Baloga uchramaslik uchun o‘qiladigan duo

Ba’zan ko‘cha-ko‘yda, yo‘lda, bozor va yana boshqa yerlarda turli musibatga uchragan, sinovga mubtalo bo‘lganlarni uchratamiz. Masalan, avtohalokat hodisasi, yong‘in, biror kasallikka chalingan va h.k.

Kimdir ularni holini ko‘rib achinadi, yordam berishga harakat qiladi, bunga imkoniyati yetmasa haqiga duo qiladi. Ba’zilar esa “ko‘ziga qarasa bo‘lmaydimi”, “hammasiga o‘zi sababchi”, “o‘zini ehtiyot qilsa bo‘lmasmidi” kabi turli “tanbeh”larni beradi. Yana boshqalar darhol cho‘ntagidan qo‘l telefonini chiqarib suratga, videoga olishga “oshiqadi”.

Aslida har bir banda sinovga duchor bo‘luvchidir. Zero, bu dunyo – sinovlar maydoni. Undagi bir sinovning ortidan to‘xtamay ikkinchisi, uchinchisi..... yetib keladi. Ha, hayot aslida ana shunday bitmas-tuganmas imtihonlar zanjiridir. Alloh taolo bunday marhamat qiladi: «Odamlar: “Imon keltirdik”, deyishlari bilangina, sinalmagan hollarida qoldiriladilar, deb o‘yladilarmi?! Biz ulardan oldingi (imonli) kishilarni sinagan edik-ku!» (Ankabut surasi, 2-3 – oyatlar).

Banda duchor bo‘lgan va bo‘ladigan barcha sinovlar Alloh taoloning xohish-irodasi bilan bo‘ladi. Alloh xohlagan ish bo‘lmay qolmas va xohlamagan ish aslo bo‘lmas. Alloh taolo bunday marhamat qiladi: “Xoh yerga va xoh o‘zlaringizga biror musibat yetsa, Biz uni paydo qilishimizdan ilgari Kitobda (Lavhul-mahfuzda bitilgan) bo‘lur. Albatta, bu Allohga osondir” (Hadid surasi, 22-oyat).

Muhimi musibat yetganda, sinovga uchraganda yolg‘iz Alloh taolodangina yordam so‘rash, O‘zidangina umidvor bo‘lish, sabr qilib ulug‘ ajrni qo‘lga kiritishga intilish lozim. Alloh taolo bunday marhamat qiladi: “Sizlarni biroz xavf-xatar, ochlik (azobi) bilan, molu jon va mevalar (hosili)ni kamaytirish yo‘li bilan sinagaymiz. (Shunday holatlarda) sabr qiluvchilarga xushxabar bering (ey, Muhammad)!” (Baqara surasi, 155-oyat).

Xo‘sh, mo‘min bandaning birodarini musibatga, baloga uchraganini ko‘rganda odobi qanday bo‘lmog‘i lozim? Har bir ishda ummatlariga o‘rnak bo‘lgan sevikli Payg‘ambarimiz Rasululloh sollallohu alayhi vasallam bunday holatda ushbu duoni o‘qishni ta’lim berganlar:

 الحمد لله الذي عافاني مما ابتلاك به وفضلني على كثير ممن خلق تفضيلا لم يصبه ذلك البلاء

Abu Hurayra roziyallohu anhudan rivoyat qilinadi. Rasululloh sollallohu alayhi vasallam: «Kim baloga uchragan kishini ko‘rganda “Alhamdu lillahillaziy a’faniy mimmaa ibtalaaka bihi va fazzalaniy a’la kasiyrin mimman xolaqa tafziylan” desa, unga o‘sha balo yetmaydi», dedilar (Imom Termiziy rivoyati).

Alloh taolo barchamizni turli balo-ofat va kasalliklardan O‘z panohida saqlasin. Nusrat, ofiyat ato etsin. Xuzur-halovatda, tinch, osoyishta, iymon lazzatidan bahramand holatda hayot kechirishimizni nasib aylasin.

Davron NURMUHAMMAD