Sofiya universitetining professori Svetan Teofanov musulmon bo‘ldi. Bunga Qur’on ma’nolarining bolgar tiliga tarjimasini tayyorlagani sabab bo‘ldi.

– Men davlat buyurtmasi bilan Qur’onni tarjima qila boshladim. Bundan maqsad musulmonlarga yordam berish emas, balki musulmon davlatlariga nisbatan siyosat yuritish edi. Tarjima boshlangandan so‘ng bir muddat o‘tib davlat nashriyoti o‘z faoliyatini to‘xtatdi. Ammo men tarjimani o‘z uyimda davom ettirdim. Asta-sekin ushbu buyuk kitobni yaxshiroq tushuna boshladim va qalbim ochildi”, – dedi Svetan Teofanov.

Olimning ta’kidlashicha, Allohning inoyati bilan talabaligidan boshlab arab tiliga qiziqib qolgan. Bu unga nafaqat ilmiy martaba berdi, balki haqiqatga yo‘l ochgan. Bu haqda olim bunday deydi: “Talabaligimda arab harfi va matnlari tartibi yoqib qolgandi. Bu muhabbat umr bo‘yi davom etadi, inshoalloh. Bu taqdir. Islom hayotimni butunlay o‘zgartirdi. Hozir dinim ko‘rsatmalariga amal qilyapman. Musulmon kamtar va dono bo‘lishi kerak. Buni menga Islom o‘rgatdi”.

Islamisemya.com xabar berishicha, hozirda akademik Svetan Teofanov Sofiya universitetida klassik arab adabiyoti, Qur’on va hadisshunoslik fanlaridan dars berish bilan birga, tadqiqot va tarjimonlik faoliyatini davom ettirmoqda.

O‘zbekiston musulmonlari idorasi Matbuot xizmati