Toshkent viloyati Zangiota tumanidagi “Abdujalilbob” jome masjidi yangi binosi qurilishi boshlanishi munosabati bilan marosim bo‘lib o‘tdi. Unda viloyati bosh imom-xatibi Xayrulloh domla Turmatov nuroniy otaxonlar bilan birga masjidning yangi binosiga ilk g‘ishtni qo‘yib berdilar.
Tadbirda Xayrulloh domla viloyatdagi jami 52 ta masjidlarda qayta qurish va ta’mirlash ishlari bo‘layotgani, bundan maqsad namozxonlar uchun har tomonlama qulay sharoit yaratish ekani haqida alohida ta’kidladilar. Shuningdek, xayrli ishga jonbozlik ko‘rsatayotgan, sabot va matonat bilan xizmat qilayotganlar ikki dunyoda ulkan ajru savobga ega bo‘lishi ta’kidlandi.
Marosimda Qur’on tilovat qilinib, dinimiz rivoji, yurt taraqqiyoti, xalq farovonligini so‘rab xayrli duolar qilindi, qurilish ishlariga muvaffaqiyat tilandi.
Ma’lumot uchun, 2018 yilning 5 yanvar kuni Yurtboshimiz Toshkent viloyati xalq deputatlari kengashining navbatdan tashqari sessiyasida viloyatdagi ta’mirga muhtoj va avariya holatidagi masjidlarni aniqlab, ularni qayta qurish va ta’mirlash choralarini ko‘rish yuzasidan ko‘rsatma bergandilar. Shu munosabat bilan 2018 yil 15 fevralda Vazirlar Mahkamasining “Muqaddas qadamjolar, ziyoratgohlar, masjidlar va qabristonlarni obodonlashtirish ishlarini samarali tashkil etish to‘g‘risida”gi qaror qabul qilinib, viloyatda 29 ta jome masjidni qayta qurilish belgilangan edi. Zangiota tumanidagi “Abdujalilbob” jome masjidi yangi binosi qurilishi ham yuqoridagi ko‘rsatma va qaror ijrosi sifatida amalga oshirilmoqda.
O‘zbekiston musulmonlari idorasi matbuot xizmati
Ulamolar biror bir mazhabga ergashish borasida Quron oyatlari va hadisi shariflardan ishoralar keltirib aytishadiki,«...Agar bilmaydigan bo‘lsangiz, ahli zikrlardan so‘rangiz» (16:43).
Huzayfa roziyallohu anhu Rasululloh sollallohu alayhi vasallamdan rivoyat qilgan hadisda: «Men sizlarning orangizda yana qancha qolishimni bilmayman. Shunday ekan, mendan so‘ng u ikkisi: Abu Bakr va Umarga iqtido qiling» (Termiziy, Ibn Moja, Ahmad), deyilgan.
Imom Muslim «Sahih» asarining sharhlovchisi Imom Navaviy muayyan imomga taqlid qilishning shartligini sharhlab: «Sabab shundaki, mazhablardan birini tanlashga ruxsat berish kishilarni, ular o‘z xohishlariga mos keladigan oson narsaga ergashishiga olib keladi. Ular halol va harom, ruxsat etilgan va man etilgan narsalarning orasidan o‘zlariga mosini tanlaydilar. Bu mazhablar osonlashtirilmagan, tizimlashtirilmagan yoki mashhur bo‘lmagan ilk islom davridan farqli ravishda mas’uliyat tashvishidan ozod qilishga olib keladi. Shular asosida kishi o‘zi qat’iy ravishda amal qiladigan mazhablardan birini tanlashi lozim bo‘ladi», degan .Boshqa manbada: «Bu ummat ijmo qilgan, to‘g‘irlangan, yozib qo‘yilgan to‘rt mazhabdir. Bizning kunimizgacha odamlar unga taqlid qilishib o‘zlarini o‘shandan deb hisoblaydilar. Bunda, ayniqsa, qat’iyatlilik kamaygan, xohishlarimiz ongimizga o‘rnashgan va odamning ahmoqona ehtirosi xuddi fazilat sifatida qaraladigan bugungi kunda, ko‘pgina aniq ustunlik bor», deb yozgan.
Yangi Namangan tumani "Abdulloh ibn Mas’ud" jome masjidi
imom-xatibi Sh.To‘xtabayev