Sayt test holatida ishlamoqda!
15 Iyun, 2025   |   19 Zulhijja, 1446

Toshkent shahri
Tong
03:04
Quyosh
04:49
Peshin
12:29
Asr
17:39
Shom
20:01
Xufton
21:39
Bismillah
15 Iyun, 2025, 19 Zulhijja, 1446

“Muallimi soniy” kitobining video qo‘llanmasi hamda AlQuranuz nomli mobil ilovasining taqdimoti bo‘lib o‘tdi

04.03.2020   4385   5 min.
“Muallimi soniy” kitobining video qo‘llanmasi hamda AlQuranuz nomli mobil ilovasining taqdimoti bo‘lib o‘tdi

“Muallimi soniy” kitobining video qo‘llanmasi hamda AlQuranuz nomli mobil ilovasining taqdimoti bo‘lib o‘tdi

 

Bismillahir Rohmanir Rohiym

 

Qur’oni Karim bizgacha yetib kelguncha ne-ne ulamolar, imomlar kechayu kunduz mehnat qilib, zahmat chekib Alloh taoloning Kalomi kelajak avlodlarga yetib kelgunicha harakat qilishgan. Ana shunday zahmatkash, qiroat olimlaridan biri, dunyoga mashhur hofizi Qur’on Shayx Alijon qori Fayzulloh maxdum o‘g‘li tomonidan “Muallimi soniy” kitobining yangicha video qo‘llanmasi hamda AlQuranuz nomli mobil ilova tayyorlandi.

Shu munosabat bilan joriy yilning 4 mart kuni Shayx Muhammad Sodiq Muhammad Yusuf majmuasining masjlislar zalida mazkur qo‘llanmalarning taqdimot marosimi bo‘lib o‘tdi.

Anjumanga O‘zbekiston musulmonlari idorasi rahbariyati, bo‘lim mudirlari, xodimlari, yurtimizning ko‘zga ko‘ringan ulamolari, imom-xatiblari, Qur’on muxlislari tashrif buyurdilar.

Tadbir Qur’oni Karim tilovati bilan boshlandi. Tilovatdan so‘ng duo qilinib, Alloh taolodan tadbirning chiroyli o‘tishi so‘raldi.

O‘zlarining dil izhorlarini bayon etish uchun birinchi bo‘lib O‘zbekiston musulmonlari idorasi bo‘lim boshlig‘i, uzoq yillardan beri xalqimizga Dinimizni yetkazib kelayotgan ustozlarimizdan Erdon domla Esonovni so‘zga chiqdilar.  

Domla o‘z so‘zlarida ushbu tadbirni O‘zbekiston musulmonlari idorasi rahbarligida o‘tkazish tashabbusini muftiy Usmonxon Alimov hazratlari berganlarini, ammo Samarqandda bo‘lib o‘tayotgan konferensiya sababli tadbirda o‘zlari ishtirok eta olmayotganliklarini aytib, muftiy hazratlarining tabrik va salomlarini anjuman mehmonlariga yetkazdilar.

Shundan so‘ng so‘z navbati Ubay ibn Ka’b jome’ masjidi imom-xatibi Abdulhakim qori Matqulovga berildi. Qori aka Shayx Alijon qorining xizmatlarini e’tirof qilgan holda, o‘zlarining samimiy tilak va dil so‘zlarini bayon qildilar. O‘tayotgan tadbir yurtboshimiz tashabbuslari bilan 2018 yilda yurtimizda o‘tkazilgan Qur’oni Karim musobaqasining samarasi ekanini ta’kidladilar.

Shundan keyin so‘z navbatini Shayx Alijon qori akaning ustozlari va safdoshlari bo‘lgan O‘zbekiston Xalqaro Islom akademiyasi katta o‘qituvchisi Burhoniddin domla Ahmedovga berildi. Domla o‘z so‘zlarida Shayx Alijon qori aka bilan bog‘liq shirin xotiralarini yodga oldilar. Buni tinglagan barcha mehmonlarning ko‘zlari yoshlandi.

Shundan so‘ng so‘z tadbirning asosiy qahramoni, o‘nta qiroat bo‘yicha ijoza sohibi, minglab qorilar ustozi Shayx Alijon qoriga berildi. Qori aka so‘zlarini tadbir tashkilotchilari va ishtirokchilariga tashakkur aytish bilan boshlab, yig‘ilganlarga Qur’oni Karimning turli qiroatlaridan namunalar o‘qib berdilar. So‘zlari davomida “Muallimi soniy” kitobining video qo‘llanmasi 27 yillik mehnatlari mahsuli ekanini ta’kidlab o‘tdilar.

Keyin ko‘plab tolibi ilmlarga Qur’oni Karimdan saboq berayotgan va hofizi Qur’onlar yetishtirish borasida samarali mehnat qilayotgan ustozlardan biri, Shayx Alijon qori akaning yetuk shogirdlaridan bo‘lmish Imom Buxoriy nomidagi Toshkent Islom institutining Tahfizul Qur’on kafedrasi mudiri Jahongir qori Ne’matovga minbarga chiqdilar.

Qori aka ham o‘z so‘zida ustozi Alijon qoriga tashakkurlarini izhor qilish bilan birga video qo‘llanma borasida ayrim mulohazalarini eslatib o‘tdilar.

So‘nggida “Muallimi soniy” video qo‘llanmasi va AlQuranuz  nomli mobil ilovadan foydalanish yo‘l-yo‘riqlari, ularning afzallik jihatlari va qulayliklari haqida batafsil so‘zlab berish uchun so‘z navbati ushbu qo‘llanmalar ustida samarali mehnat qilgan, soha mutaxassisi Sanjarbek Nasirbekovga berildi.

Alijon qori aka ushbu taqdimotni Misr jumhuriyatida o‘tkazishlari ham mumkinligi, lekin u kishining o‘z xalqiga, ona vataniga bo‘lgan muhabbati ushbu bebaho qo‘llanmalarni shu yerda taqdim etishga undagani tadbir davomida alohida qayd etildi.

Shundan so‘ng barcha yig‘ilganlarning iltimoslariga binoan Shayx Alijon qori akaning o‘zlari tilovat qilib berdilar va yakuniy duo bilan tadbir o‘z nihoyasiga yetdi.

Barcha mehmonlar ko‘tarinki kayfiyat va o‘zgacha shukuh bilan tarqaldilar.

Alloh taolo yurtimizda mehnat qilayotgan barcha qori ustozlar, ulamolar, ahli ilmlardan, jumladan, Shayx Alijon qori akadan rozi bo‘lsin! Qur’oni Karimni elimiz, xalqimiz orasida keng yoyish, hofizi Qur’onlarni yetishtirish yo‘lidagi xizmatlaringning ajrini ko‘paytirib bersin va mehnatlarining samarasini mo‘l-ko‘l qilsin!

Alloh taolo qilingan duolarni ijobat qilsin! Video qo‘llanmani va mobil ilovani tayyorlashda jonbozlik ko‘rsatgan, birgalikda mehnat qilgan va ushbu tadbirni tashkil etishda hissa qo‘shgan barcha insonlarning ajru savoblarini ko‘paytirib bersin!

 

 

O‘zbekiston musulmonlari idorasi Matbuot xizmati

 

 

O'zbekiston yangiliklari
Boshqa maqolalar

O‘zbekiston xalqiga Qurbon hayiti tabrigi

09.06.2025   9799   4 min.
O‘zbekiston xalqiga Qurbon hayiti tabrigi

Muhtaram vatandoshlar!

Siz, azizlarni, barcha mo‘min-musulmon yurtdoshlarimizni, butun xalqimizni ulug‘ va mo‘tabar ayyom – Qurbon hayiti bilan chin qalbimdan samimiy muborakbod etib, o‘zimning yuksak hurmatim va ezgu tilaklarimni bildirishdan g‘oyat mamnunman.

Jamiki islom ummati uchun qadrli bo‘lgan ushbu shukuhli bayram – Iyd al-Adhoni el-yurtimiz bilan birgalikda tinch va osoyishta muhitda kutib olayotganimiz uchun, avvalo, mehribon va qudratli Alloh taologa behisob shukronalar aytamiz.

Hech shubhasiz, keyingi yillarda Yangi O‘zbekistonda ijtimoiy, xalqchil davlat barpo etish, uning ma’naviy asoslarini mustahkamlash va ta’sirchanligini oshirishda muqaddas islom dini, uning asosiy bayramlaridan biri bo‘lgan Qurbon hayiti ham muhim rol o‘ynamoqda.

Ayniqsa, bu bayramning insonparvarlik, ahillik, saxovat va olijanoblik kabi fazilatlari yurtimizda “Inson qadri uchun, inson baxti uchun” degan ezgu g‘oya asosida amalga oshirilayotgan keng ko‘lamli islohotlarga uyg‘un va hamohang bo‘lib, aholining ehtiyojmand qatlamlarini qo‘llab-quvvatlash, keksalar, yoshlar va xotin-qizlar haqida alohida g‘amxo‘rlik ko‘rsatish, kambag‘allikni qisqartirishga qaratilgan dasturlarimiz samarasini oshirishga xizmat qilayotganini alohida ta’kidlash o‘rinlidir.

Aziz do‘stlar!

Bugungi kunda mamlakatimizda turli millatlar va diniy konfessiyalar o‘rtasidagi hamjihatlikni mustahkamlash, vijdon erkinligini ta’minlash, diniy-ma’rifiy merosimizni asrab-avaylash, yosh avlodni milliy va umumbashariy qadriyatlar ruhida tarbiyalash bo‘yicha ulkan ishlar amalga oshirilmoqda.

Bu haqda so‘z yuritganda, islom dinining ezgu tamoyillarini chuqur o‘rganish, buyuk tariximiz va madaniyatimiz durdonalarini, mashhur allomalarimizning boy merosini to‘plash va keng targ‘ib etishga alohida e’tibor qaratilayotganini ta’kidlash lozim. Jumladan, ko‘hna Sharq mo‘jizasi – Samarqand shahri 2025 yilda islom madaniyati poytaxti, deb e’lon qilindi, ulug‘ vatandoshimiz Imom Moturidiyning 1155 yillik tavallud sanasi yurtimiz bo‘ylab keng nishonlanmoqda, Imom Buxoriy, Imom Moturidiy va Imom Termiziy xalqaro ilmiy-tadqiqot markazlari qatoriga, shu yil Buxoro shahrida o‘z faoliyatini boshlaydigan Bahouddin Naqshband ilmiy-tadqiqot markazi ham qo‘shildi.

Poytaxtimiz Toshkent shahrida bunyod etilayotgan Islom sivilizatsiyasi markazi ilmiy-ma’naviy yo‘nalishdagi ulkan va noyob loyiha sifatida el-yurtimiz va xalqaro jamoatchilikda katta qiziqish uyg‘otmoqda. Bu muazzam maskan ko‘p ming yillik qadimiy tariximiz, boy va betakror milliy madaniyatimizning yorqin  timsoli sifatida Yangi O‘zbekiston hayotidagi g‘oyat muhim voqeaga aylanadi, deb ishonaman.

Hurmatli yurtdoshlar!

Shu saodatli kunlarda 15 ming nafar vatandoshimiz muqaddas haj ziyoratini ado etmoqda. Ezgu duo va niyatlar ijobat bo‘ladigan mana shunday munavvar lahzalarda ularni ham Qurbon hayiti bilan samimiy qutlab, Yaratgandan yurtimizga sog‘-omon qaytib kelishlarini so‘raymiz.

Umid qilamizki, muhtaram hojilarimiz jamiyatimizda birdamlik, oila va mahallalarimizda mehr-oqibat muhitini yanada mustahkamlash, yoshlarimiz tarbiyasini kuchaytirish, ularni ilm-ma’rifatga, zamonaviy kasb-hunarlarni egallashga, Vatan himoyachisi bo‘lishga targ‘ib etish, muhtoj insonlarga ko‘mak berishda alohida ibrat va namuna ko‘rsatadilar.

Qalblarimiz quvonchga to‘lgan ushbu fayzli kunlarda xorijiy davlatlarda bo‘lib turgan vatandoshlarimizni ham bugungi ulug‘ ayyom bilan chin dildan qutlab, ularga sog‘lik-omonlik, baxt va omad tilaymiz.

Jahonning uzoq-yaqin o‘lkalaridagi musulmon ummatini ham qizg‘in tabriklab, ularning xalqlari va mamlakatlariga tinchlik, ravnaq va farovonlik tilab qolamiz.

Aziz va muhtaram vatandoshlar!

Hozirgi kunda dunyo naqadar murakkab va tahlikali bo‘lib borayotganini barchamiz ko‘rib turibmiz. Bunday keskin sharoitda yurtimizda tinchlik, o‘zaro hurmat va totuvlik muhitini saqlab, barcha soha va tarmoqlarda fidokorona mehnat qilib ko‘zlagan yuksak maqsadlarimizga yeta olamiz.

Albatta, o‘z tarixida ne-ne sinov va mashaqqatlardan munosib o‘tgan mard va olijanob xalqimiz bunga har tomonlama qodir.

Bu yo‘lda el-yurtimizga mansub mehr-oqibat, o‘zaro birlik va jipslik biz uchun beqiyos kuch-qudrat manbai bo‘lib xizmat qiladi, deb ishonaman.

Siz, azizlarni muqaddas Qurbon hayiti bilan yana bir bor chin dildan tabriklab, barchangizga tinchlik-xotirjamlik, sihat-salomatlik, xonadonlaringizga fayzu baraka tilayman.

Qutlug‘ ayyom barchamizga muborak bo‘lsin!

 

Shavkat Mirziyoyev,

O‘zbekiston Respublikasi Prezidenti