Joriy yilning 11 fevral kuni Vazirlar Mahkamasi huzuridagi Din ishlari bo‘yicha qo‘mita tomonidan Axborot va ommaviy kommunikatsiyalar agentligi anjumanlar zalida “Umra safarini tashkil etish va o‘tkazish” masalalari bo‘yicha OAV vakillari va jurnalistlar uchun matbuot anjumani tashkil etildi.
Matbuot anjumanida Din ishlari bo‘yicha qo‘mita, O‘zbekiston musulmonlari idorasi, “Uzbekistan airways” rahbariyati va mutasaddi xodimlari hamda jurnalist va OAV vakillari ishtirok etdilar.
Tadbirda mutasaddilar tomonidan Umra safarini tashkil etish va o‘tkazish, so‘nggi yillarda muhtaram Prezidentimiz tashabbuslari bilan ziyoratchilarimiz uchun yanada qulay shart-sharoitlar yaratilayotgani va bu jarayon yildan-yilga yaxshilanib borilayotgani haqida batafsil ma’lumot berildi.
Shuningdek, anjumanda Din ishlari bo‘yicha qo‘mita va O‘zbekiston musulmonlari idorasi tomonidan amalga oshirilgan chora-tadbirlar natijasida respublikamiz hududlarida umra navbatlarining sezilarli darajada kamayishiga erishilgani, hozirgi kunda aksariyat viloyatlarda, jumladan, Buxoro, Samarqand, Qashqadaryo, Sirdaryo, Xorazm, Jizzax, Navoiy va Qoraqalpog‘iston Respublikasida joriy navbatlar tugatilgani aytib o‘tildi.
Tadbir davomida fuqarolarimizning umra safariga borish istaklarini to‘laqonli ta’minlash hamda joriy navbatni tezroq tugatish maqsadida qisqa fursat ichida Toshkent-Madina-Toshkent yo‘nalishida qo‘shimcha 3-reysni yo‘lga qo‘yish bo‘yicha amaliy sa’y-harakatlar olib borilayotgani alohida ta’kidlandi.
Matbuot anjumanida 2020 yil 1 fevral kunidan e’tiboran, birinchi reys Toshkent-Jidda, ikkinchi reys esa Toshkent-Madina yo‘nalishida amalga oshirilayotgani, 3-reys yo‘lga qo‘yilsa, Toshkent-Jidda yo‘nalishida 1 ta, Toshkent-Madina yo‘nalishida 2 ta reys amalga oshirilishi ma’lum qilindi.
Shuningdek, tadbirda 2019 yilning 14 noyabr kunidan e’tiboran har kuni bittadan aviareys yo‘lga qo‘yilgan bo‘lsa, 10 dekabr kunidan e’tiboran kunlik aviareyslar soni
2 taga yetgani, hozirga qadar jami 38 mingga yaqin fuqaro Umra ziyoratini ado etib qaytgani aytildi.
O‘z navbatida, bularning barchasi – muhtaram Prezidentimizning xalqni rozi qilish kerak degan ezgu tashabbuslari asosida amalga oshirilayotgani, yurtdoshlarimizning Umra amallari xavfsiz, ishonchli va eng muhimi ibodatlari mukammal bo‘lishi uchun ularga bo‘lgan yuksak e’tiborning oliy namunasi ekani qayd etildi.
Matbuot anjumanida mutasaddilar jurnalistlarni qiziqtirgan savollarga, shuningdek, veb-sayt tahririyatlari, fuqarolarimiz tomonidan Din ishlari bo‘yicha qo‘mita, O‘zbekiston musulmonlari idorasi hamda O‘zbekiston havo yo‘llariga mazkur mavzuga oid yozma ravishda kelib tushgan murojaat va savollarga atroflicha javob berdilar.
Din ishlari bo‘yicha qo‘mita
Matbuot xizmati
Savol: Chatgpt (sun’iy intellekt) orqali diniy savollarimizga javob olsak bo‘ladimi, shu javoblarga amal qilsak bo‘ladimi?
Javob: Bismillahir Rohmanir Rohiym. Yo‘q, bu joiz emas. To‘g‘ri, Chatgpt platformasi ayrim sohalarda insonlarga foyda bermoqda. Ammo diniy savollarga to‘g‘ri javob berishga ojizlik qiladi. Chunki u ham inson omili tomonidan ishlab chiqilgan bir mahsulot. Qolaversa, ba’zan savollarga taxminiy javoblar, hatto bu masala falon kitobda bor deb, arabiy iboralar ham berishi mumkin. Lekin u keltirgan iboralar na u aytgan kitobda va na boshqa fiqhiy manbalarda uchramaydi. Shu bois shar’iy masalalarga ahli ilm, mutaxassislarga murojaat qilish orqali yechim topish darkor. Alloh taolo oyati karimada bunday marhamat qilgan:
فَاسْأَلُوا أَهْلَ الذِّكْرِ إِنْ كُنْتُمْ لَا تَعْلَمُونَ
“Agar bilmaydigan bo‘lsangiz, zikr ahlidan so‘rangiz!” (Anbiyo surasi, 7-oyat).
Musulmon odam biror narsani bilmay qolsa, uni biladigan kishidan, o‘sha sohaning «zikr ahli»dan o‘rganishi lozim bo‘ladi. Shunday ekan, e’tiqod va dinu-diyonatga tegishli narsalarni ham shu sohaning bilimdonlaridan so‘rash talab etiladi. Buyuk tobeiy Ibn Sirin rahimahulloh bunday deganlar:
إن هذا العلم دين فانظروا عمن تأخذون دينكم. رواه مسلم
“Albatta, bu ilm dindir. Bas, diningizni kimdan olayotganingizga qaranglar” (Imom Muslim rivoyati).
Mazkur iboraning sharhida Mulla Ali Qori rahimahulloh bunday deganlar:
“Bu ilm” so‘zidan murod Rasululloh sollallohu alayhi vasallam ummatga olib kelgan Qur’oni karim va hadisi sharifdan iborat bo‘lgan ta’limotdir. Uni ishonchli va adolatli zotlardan olmoqdamisiz yoki yo‘q, shunga nazar solinglar, ya’ni qayerdan, kimdan ilm olayotgangizni aniq bilinglar”. (“Mirqotul mafotih” kitobi). Vallohu a’lam.
O‘zbekiston musulmonlari idorasi
Fatvo markazi.