Namoz saboqlari: Shifo istab o‘qiladigan duo (Audio)
03.01.2020
16796
2 min.
Biror kasallikka yo‘liqqan kishi, bu kasalliqdan xalos bo‘lishi uchun darrov mutaxassis shifokorlarga murojaat qilishi, uning tavsiyalariga amal qilib, ayni paytda duo ham qilishi lozim. Bu duolarni bemorning o‘zi o‘qishi yoki birov unga o‘qishi mumkin. Tahoratli holda, avvalo, Fotiha surasi, so‘ngra Qur’oni karimdan shifo oyatlari o‘qiladi.
Bismillahir rohmanir rohiym. «Va yashfi suduro qovmin mu’miniyna va yuzhib g‘oyzo qulubihim». Ma’nosi: «...hamda mo‘minlar qavmi siynalariga shifo beradi va dillaridagi alamni ketkazadi» (Tavba surasi, 14–15-oyatlar).
«Ya ayyuhan-nasu qod jaatkum mav’izotun min Robbikum va shifaun lima fis-suduri va hudan va rohmatan lil-mu’miniyn».
Ma’nosi: «Ey odamlar! Sizlarga Rabbingizdan va’z (nasihat), dillardagi narsa (shirk va boshqa illatlar)ga shifo va mo‘minlarga hidoyat va rahmat keldi» (Yunus surasi, 57-oyat).
«Va nunazzilu minal Qur’ani ma huva shifa’un va rohmatun lil-mu’miniyn».
Ma’nosi: «(Biz) Qur’ondan mo‘minlar uchun shifo va rahmat bo‘lgan (oyat)larni nozil qilurmiz» (Al-Isro surasi, 82-oyat).
«Qul huva lil-laziyna amanu hudan va shifaun».
Ma’nosi: «Ayting: «(Ushbu Qur’on) imon keltirgan zotlar uchun hidoyat va (dildagi ma’naviy illat uchun) shifodir» (Fussilat surasi, 44-oyat).
Bu oyatlar o‘qilgach, bunday duo etiladi: «Allohumma Robban-nasi azhibil-ba’sa, ishfi Antash-shafiy la shifa’a illa shifa’uka, shifa’an la yug‘odiru saqoman». «Yo Alloh, ey insonlarning Rabbi, kasallikni arit! Kasallikni qoldirmaydigan shifo ber. Shifo berguvchi faqat O‘zingsan. Sendan o‘zga shifo berguvchi yo‘qdir» (Abu Dovud. «Janoiz», 3107-hadis).
Allohumma ishfi ’abdaka yanka’ laka ’aduvvan av yamshi laka ila solatin.
«Yo Alloh, shu bandangga shifo ber, u Sening bir dushmaningni nobud qilsin yoxud Sening rizoligingga erishmoq uchun namoz o‘qishga yurib borsin».
«Bismillahi arqika min kulli shay’in yu’zika min sharri kulli nafsin av ’ayni hasidin. Allohumma yashfiyka, bismillahi arqika».
«Senga iztirob beruvchi hamma narsadan, har hasadgo‘y nafsdan yoxud ko‘zdan Allohning nomi ila senga shifo so‘rayman. Alloh nomi ila senga shifo so‘rayman» (Imom Termiziy. «Janoiz», 972-hadis).
Savol: Ota-onam meni majburlab erga bermoqchi, bola bilan ko‘rishdim va ko‘nglim g‘ash bo‘lib qoldi. Keyin istixora o‘qishni boshladim va baribir ko‘nglim yumshamadi. Uydagilarga tushuntirdim, lekin meni eshitishmayapti. Men qanday yo‘l tutsam bo‘ladi?
Javob: Bismillahir Rohmanir Rohiym. Dinimizda xotin-qizlarni majburlab erga berishdan man qilingan. Zero, nikoh ikki tomonning roziligi bilan tuziladi. Juvon bo‘lsa, u bilan ochiqcha gaplashiladi, bokira bo‘lsa, undan izn so‘raladi. Bokira (rozilik alomatlari bilan) sukut qilsa, bu uning nikohga izn bergani bo‘ladi.
Barcha fiqhiy manbalarimizda kelin va kuyov o‘z roziligini bildirishi (iyjob va qabul) nikohning asosiy rukni ekani bayon qilingan. Kelin-kuyovdan biri nikohga rozi bo‘lmasa, nikoh durust bo‘lmaydi.
Ota-onaning vazifasi esa farzandini boylik, mansab yoki boshqa g‘arazlar sababli ko‘r-ko‘rona uylanish yoki erga tegishga majburlash emas. Balki farzandiga juft bo‘layotgan yigit yo qizning diyonati, xulq-odobiga va kasb-hunariga e’tibor qilishdir.
O‘z o‘rnida turmush qurayotgan farzand ham ota-onasining tavsiyalari o‘rinli bo‘lsa, qabul qilishi, qaysarlik qilmay ularning hayotiy tajribalaridan foydalanishi kerak.
Xotin-qizlarni majburlab erga berish holatlarida Payg‘ambarimiz alayhissalomning ayolga nikoh yo ajralishni tanlash ixtiyorini berganlari ma’lum. Hatto bir holatda qiz kambag‘al yigitni, ota-ona esa boy yigitni tanlaganida, u zot qizning ixtiyorini ustun qo‘yib:
لم ير للمتحابين مثل النكاح
«Bir-birini yaxshi ko‘rganlar uchun nikohdan yaxshisi yo‘qdir", dedilar (Imom Ibn Moja rivoyati). Vallohu a’lam"
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 