Joriy yilning 16 dekabr kuni Abu-Dabi (BAA) Milliy ko‘rgazma markazida BMTning Korrupsiyaga qarshi konvensiyasiga a’zo davlatlar konferensiyasining sakkizinchi sessiyasi o‘z ishini boshladi. Unda O‘zbekiston adliya vazirligi delegatsiyasi ham ishtirok etmoqda.

Ishtirokchilarga O‘zbekistonda korrupsiyaga qarshi ko‘rilayotgan choralar to‘g‘risida batafsil ma’lumot berilgan. Mamlakatda ushbu o‘ta salbiy hodisaning oldini olish va unga qarshi kurashish, huquqiy hamda institutsional asoslarni mustahkamlash bo‘yicha qat’iy qadamlar qo‘yilayotgani ta’kidlandi. Davlat siyosati korrupsiya xatarlarining sabablari va shartlarini har tomonlama o‘rganishni, huquqbuzarliklarni o‘z vaqtida aniqlash va ularga barham berishni, jazoning muqarrarligi prinsipini nazarda tutadi.

Prezident Shavkat Mirziyoyev saylanganidan keyin imzolagan birinchi qonun bu - “Korrupsiyaga qarshi kurashish to‘g‘risida”gi qonun bo‘ldi. Bu mamlakat rahbariyati siyosiy yo‘nalishining aniq belgisiga aylandi.

O‘z navbatida, davlat xizmatlarini taqdim etishda jismoniy va yuridik shaxslarga “yagona darcha” asosida davlat xizmatlarini ko‘rsatish tizimi shakllantirildi. Bu fuqarolar va davlat hokimiyati hamda boshqaruvi organlari xodimlari o‘rtasida davlat xizmatlarini ko‘rsatishda yuzaga kelishi mumkin bo‘lgan korrupsiya holatlarining oldini olishga yordam beradi.

O‘zbekiston musulmonlari idorasi Matbuot xizmati