Ma’lumki kuni kecha yurtimizga hadis ustozi, alloma, muhaddis, tanqidchi shayx muftiy Abdulloh ibn Umar Bashir Ma’rufiy al-A’zomiy al-Hindiy boshchiligidagi mehmonlar O‘zbekiston bo‘ylab ziyoratlarini boshladilar.

Bugun 2019 yil 9 noyabr kuni Toshkent shahridagi fazilatli shayx Muhammad Sodiq Muhammad Yusuf hazratlari asos solgan «Hilol nashr» nashriyot-matbaasiga tashrif buyurdilar. Mehmonlarni «Shayx Muhammad Sodiq Muhammad Yusuf» jome masjidi bosh imom-xatibi, «Hilol-nashr» matbaa nashriyoti va «islom.uz» portali rahbari Ismoil Muhammad Sodiq kutib oldi. Tashrif davomida shayx muftiy Abdulloh ibn Umar Bashir Ma’rufiy boshchiligidagi mehmonlar nashriyot bosmaxonasi, ijodiy jamoasi hamda savdo do‘koni bilan yaqindan tanishdilar.

So‘ngra «Shayx Muhammad Sodiq Muhammad Yusuf» majmuasiga tashrif buyurdilar. Mehmonlar muhtasham qurib bitkazilgan masjidga kirdilar, so‘ngra majmua kutubxonasiga tashrif qilishdi. U yerdan chiqib majmuaning anjumanlar zalini iliq taassurotlar bilan sayr qildilar.

Majmua tashrifidan keyin shayx muftiy Abdulloh ibn Umar Bashir Ma’rufiy boshchiligidagi mehmonlar Toshkentdagi Qorasaroy ko‘chasining Hasti Imom (Hazrati Imom) majmuasiga borishdi va u yerdagi muzey-kutubxonada saqlanayotgan Usmon Mus'hafini ko‘zdan kechirdilar.

Keyin Abu Bakr Qaffoli Shoshiy rohimahullohning qabrlari ziyorat qilindi.

So‘ngra Imom Buxoriy nomidagi Toshkent Islom institutiga tashrif buyurishdi. Tashrif asnosida oliygohda tahsil olayotgan talabalar bilan uchrashuv bo‘lib o‘tdi. Uchrashuv jarayonida muhaddis, tanqidchi shayx muftiy Abdulloh ibn Umar Bashir Ma’rufiy hadis ilmidan mav’izalar qildilar. Tadbirda mehmonlar tomonidan institut kutubxonasiga hadis kitoblari sovg‘a tariqasida topshirildi. Uchrashuv yakunida yurtimizning aziz mehmonlari va talabalar duoi xayrlar qilishdi.

Islom.uz portali tahririyati

Manba: https://islom.uz