7 oktyabr kuni Toshkent shahrida Islom hamkorlik tashkiloti (IHT) Inson huquqlari bo‘yicha mustaqil doimiy komissiyasining “Tinchliksevar, demokratik jamiyatlar barpo etish va barqaror rivojlanish yo‘lida yoshlar huquqlarini rag‘batlantirish va himoya qilishning ahamiyati” mavzusidagi seminari boshlandi. Tadbir avvalida Toshkent shahridagi "Hazrati Imom" jome masjidi imom noibi Habibulloh qori Abdurazzaqov Qur’oni karim oyatlarini tilovat qildi va xayrli duolar o‘qildi.
Nufuzli anjumanda O‘zbekiston musulmonlari idorasi raisi, muftiy Usmonxon Alimov hazratlari, Diniy idora raisi maslahatchisi Abduhakim qori Matqulov va Kotibiyat mudiri Muhammad Ayubxon Homidov ishtirok etmoqda.
Ushbu xalqaro seminar O‘zbekiston Respublikasi hukumati, IHT Inson huquqlari bo‘yicha mustaqil doimiy komissiyasi va BMTning Inson huquqlari bo‘yicha Oliy komissari Boshqarmasi tashabbusi bilan tashkil etildi.
Seminarda tinchliksevar, demokratik jamiyatlar barpo etish va barqaror rivojlanish yo‘lida yoshlar huquqlarini rag‘batlantirish hamda himoya qilishning ahamiyati muhokama qilinadi. Anjuman ishi doirasida BMTning Yoshlar huquqlari to‘g‘risidagi xalqaro konvensiyasi loyihasini qo‘llab-quvvatlashga alohida e’tibor qaratiladi.
Seminarda IHTning Inson huquqlari bo‘yicha mustaqil doimiy komissiyasi a’zolari, xalqaro ekspertlar, IHTga a’zo va kuzatuvchi maqomidagi 50 ga yaqin davlat, shuningdek, inson huquqlarini himoya qilish bo‘yicha milliy muassasalar vakillari ishtirok etmoqda.
Anjuman tafsilotlarini saytimizda yoritib boramiz.

O‘zbekiston musulmonlari idorasi Matbuot xizmati