Oliy ma'had ustozlarining Misr safari qanday o'tdi?
Toshkent islom institutining “Tahfizul Qur'on” kafedrasi ustozlari Qur'oni karim va unga taalluqli bo'lgan maxsus ilmlarni talabalar va yurtimiz yoshlariga ta'lim berib kelmoqda. Jumladan, ushbu kafedrada Qur'on qiroati va tajvid, Tafsir, Ulumul Qur'on fanlari mutaxassislik darajasida tahsil beriladi.
O'zbekiston musulmonlari idorasi tashabbusi bilan joriy yil avgust oyida “Tahfizul Qur'on” kafedrasining malakali ustozlaridan iborat jamoa Misr Arab Respublikasining Iskandariya shahridagi “Al-Azhar” universitetiga tashrif buyurdilar. U erda Azhari sharif tasarrufidagi “Ma'hadul qiroat”, ya'ni Qiroatlar institutining Qur'on qiroatlari va tajvid ilmi shayxlaridan ta'lim olib, malaka oshirdilar.
Prezidentimiz shu yilning iyun' oyida Surxondaryodaga tashrifi davomida “Toshkent islom institutida 2024 yildan magistratura, 2025 yildan doktorantura yo'nalishida kadrlar tayyorlash yo'lga qo'yiladi” deb ta'kidlagan edi.
Mazkur ilmiy safar ham Toshkent islom institutida ochilajak magistratura bosqichida o'qitilishi ko'zda tutilgan fanlar bo'yicha amalga oshirildi.
“Ma'hadul qiroat” institutining 10 qiroat, Usuli tafsir, Tafsir, Ulumul Qur'on ilmlarida mutaxassis bo'lmish uch nafar olimidan Tahfizul Qur'on kafedrasi o'qituvchilari Toshkent islom institutining magistratura bosqichida o'qitilishi rejalashtirilgan fanlardan malaka oshirdi:
• Shayx Sayyid Hattob Abdulhamid Mag'robiy – sug'ro va kubro 10 mutavotir qiroat va 4 shozz qiroat mutaxassisi;
• Amr Ibrohim Muhammad Uvaydo – sug'ro va kubro 10 mutavotir qiroat, hanafiy mazhabi fiqhi, arab tili grammatikasi mutaxassisi;
• Abdurrahmon Raf'at Muhammad G'unaym – sug'ro va kubro 10 mutavotir qiroat, usulul-fiqh, tafsir ilmlari mutaxassisi.
Safar oxirida “Al-Azhar” va “Ma'hadul qiroat” shayxlari tomonidan kafedra ustozlariga qiroatlar va ilmiy asarlarning ijoza shahodatnomalari hamda malaka oshirgani to'g'risida faxriy yorliqlar topshirildi.
Toshkent islom instituti rektori, siyosiy fanlar doktori, professor Muhammadolim domla Muhammadsidiqov Misrda bo'lib qaytgan Jahongir qori Ne'matov boshchiligidagi Tahfizul Qur'on kafedrasining 10 ga yaqin qori ustozlarini qabul qilib, ilmiy safarda erishilgan natijalar, oldinga qo'yilgan maqsad-vazifalarning ijrosi, magistratura bosqichida o'tiladigan Qur'onga oid fanlar va ulardan olingan ijozalar bilan tanishib, kelgusidagi rejalar muhokama qilindi.
Mazkur qisqa muddatli ilmiy safar orqali “Tahfizul Qur'on” kafedrasi ustozlariga yaqin o'tmishda uzilgan ilmiy silsilalarni qayta tiklash va muborak oltin silsilalarni Vatanimizga qaytarish imkoniyati berildi.
Allohning izni bilan bu ilmlar yurtimizda bo'ylab va Qur'on nuri xonadonlarimiz uzra yanada ko'proq taraladi.
Jahongir Ro'ziyev,
TII «Tahfizul Qur'on» kafedrasi o'qituvchisi,
«Qur'oni karim va tajvid» o'quv kurslari bo'limi boshlig'i
Ulug‘ ajdodimiz me’rosiga oid respublika ilmiy-amaliy anjumani o‘tkazildi (foto+)
Bugun, 30 iyun kuni Xorazm Ma’mun akademiyasida "Najmiddin Kubro ma’naviy-ma’rifiy merosi va uning zamonaviy tadqiqi" mavzusida respublika ilmiy-amaliy konferensiyasi bo‘lib o‘tdi.
Mazkur anjuman Davlatimiz rahbarining Najmiddin Kubro tavalludining 880 yilligini keng nishonlash to‘g‘risida ilgari surgan tashabbusi doirasida ulug‘ ajdodimizning ilmiy va ma’naviy merosini chuqur o‘rganish, bu merosni zamonaviy tadqiqot metodlari asosida tahlil qilish hamda uning umuminsoniy va milliy qadriyatlar tizimidagi o‘rnini belgilash maqsadida tashkil etildi.
Anjuman doirasida Najmiddin Kubroning tasavvufiy va ma’rifiy g‘oyalari, ularning zamonaviy ma’naviy-axloqiy muammolarni hal etishdagi o‘rni, allomaning hayoti va faoliyatiga oid tarixiy manbalar, asarlarining bugungi kundagi ilmiy va amaliy ahamiyati, kubroviylik ta’limotining tarixi va bugungi holati, shuningdek, ushbu ta’limotning keyingi tasavvuf maktablariga ta’siri keng muhokama etildi.
O‘zbekiston musulmonlari idorasi
Matbuot xizmati
- «
- »