Bilasizmi, Payg‘ambarimiz sollallohu alayhi vasallamning nabiralari Hasan va Husayn roziyallohu anhumo egizak emaslar. Balki Hasan roziyallohu anhu Husayn roziyallohu anhudan deyarli bir yosh kattadirlar.

Bilasizmi, Salohiddin Ayyubiy rahimahulloh oqsoq edilar. Urushlardan birida oyoqlari jarohatlanib, to vafotlarigacha oqsoqlanib yurganlar. Jangu jadallarda ham shu holda ishtirok etganlar.

Bilasizmi, Salohiddin Ayyubiy rahimahullohning asl ismlari Yusuf ibn Ayyub bo‘lib, “Salohuddin” u kishining laqablaridir.

Bilasizmi, Xolid ibn Valid roziyallohu anhu yuzdan ortiq jangda ishtirok etganlar. Ammo biror marta mag‘lub bo‘lmaganlar. Tanalarida qilich, nayza, kamon o‘qi tegmagan biror joy yo‘q edi. Deyarli hamma joylari yaralangan edi. Lekin shunga qaramasdan u kishi jang maydonida emas, balki uylarida, to‘shakda vafot etganlar. Nabiy sollallohu alayhi vasallam u kishini “Allohning qilichi” deb nomlaganlar. “Allohning qilichi” deb atalgan kimsa mag‘lub bo‘larmidi?!

Bilasizmi, Muhammad ibn Qosim Saqafiy tarixdagi eng kichik fotihdir. U Sind (Pokiston hududi), Hind o‘lkalarini fath qilganda o‘n yetti yoshda edi.

Bilasizmi, erkaklarga nomahram ayollarga nazar solishdan tiyilish buyurilganidek, ayollarga ham nomahram erkaklarga nazar solishdan tiyilish buyurilgan. Alloh taolo Qur’oni Karimda shunday marhamat qilgan:

“Sen mo‘minlarga ayt, ko‘zlarini tiysinlar va farjlarini saqlasinlar. Ana shu ular uchun pokdir. Albatta, Alloh nima hunar qilayotganlaridan xabardordir. Sen mo‘minalarga ayt: Ko‘zlarini tiysinlar, farjlarini saqlasinlar va ziynatlarini ko‘rsatmasinlar...” (Nur surasi, 30-31-oyatlar)

Internet ma’lumotlari asosida Nozimjon Hoshimjon tayyorladi