Alloh taboraka va taologa shukrki, yurtimizda hukm surayotgan tinchlik-omonlik va dinimizga bo‘lgan yuksak e’tibor sabab, masjidlarda bunyodkorlik ishlari qizg‘in davom etmoqda.
Toshkent viloyati Zangiota tumani Ittifoq mahallasida joylashgan “Salmon Forsiy” jome masjidi dastlab 1992-1994 yillarda hashar yo‘li bilan qurilgan. O‘tgan davr mobaynida masjid binosi eskirib, yer to‘la qismi, poydevorlari yaroqsiz holga kelib qolgan edi. Qolaversa, oxirgi paytlarda masjid jamoati sezilarli darajada ortib, xonaqoh torlik qilayotgan edi. Shu sababli mahalla ahli ezgu niyat bilan masjidni qayta qurish taklifini olg‘a surishdi. Ushbu xayrli tashabbus O‘zbekiston musulmonlari idorasi tomonidan qo‘llab-quvvatlangach qayta qurish ishlari boshlab yuborildi.
Shu yilning 11 sentyabr kuni Toshkent viloyati Zangiota tumanida joylashgan “Salmon Forsiy” jome masjidining yangi binosiga birinchi g‘isht qo‘yish tadbiri bo‘lib o‘tdi. Muftiy hazratlari qurilayotgan masjid qiyomatgacha xizmat qilishini niyat qilib, birinchi g‘ishtni qo‘yib berdilar. Nuroniylar va ezgu niyatda yig‘ilgan qalbi pok insonlar ham birin-ketin poydevorga g‘isht qo‘ydilar.
Muftiy Usmonxon Alimov hazratlari marosimda masjid ahlini ushbu Allohning uyi bilan tabrik qilib, jumladan shunday so‘zlarni bildirdilar:
– Alloh taologa hamdu sanolar bo‘lsinki, buyuk allomalar yurti bo‘lmish yurtimizda so‘nggi yillarda masjid-madrasalar qurish odatiy jarayonga aylanib bormoqda. Har kuni yurtimizning turli viloyatlaridan yangi-yangi masjid qurilayotgani yoki qurib bitkazilib, ishga tushgani haqida xushxabarlar kelib turibdi, ko‘plarida o‘zimiz ham ishtirok qilyapmiz.
Muhtaram Yurtboshimizning rahnamoliklarida mo‘min-musulmonlarimizning talab va istaklaridan kelib chiqib, so‘nggi yillarda 24 ta yangi jome masjid ochildi, 116 ta masjid qaytadan barpo etildi va 200 tasida joriy ta’mirlash ishlari amalga oshirildi.
Endilikda mana shunday ko‘rkam masjidlarda imom-domlalarimiz xalqimizga, ayniqsa, yoshlarimizga Islom dini ma’rifatini yetkazish, ularning ta’lim-tarbiyasini yaxshilash va ezguliklar tarqatish ishida juda ham faol bo‘lishlari zarur. Shuningdek, bugungi murakkab davrda ayrim g‘o‘r kimsalarning buzg‘unchi oqimlar ta’siriga tushib qolishining oldini olish dolzarb vazifa bo‘lmoqda.
Muftiy hazratlari so‘zlarining davomida Payg‘ambarimiz Muhammad sollallohu alayhi vasallamning «Kim bir masjid qursa, Alloh unga jannatda shuning mislini qurib beradi», degan hadisi shariflarini keltirib, mazkur jomeni barpo etishga hissa qo‘shgan barchaning haqqiga duolar qildilar.
Tadbirda ulamolar, mahalla faollari, mo‘ysafid otaxonlar va keng jamoatchilik vakillari ishtirok etdi.
Muftiy hazratlari Toshkent viloyati Zangiota tumanidagi “Imomi A’zam” jome masjidida yakuniga yetayotgan qurilish-ta’mirlash ishlari bilan ham yaqindan tanishdilar.
Alloh taolo ushbu jome masjidlarni xalqimizga muborak aylasin!

p>

O‘zbekiston musulmonlari idorasi Matbuot xizmati