Saudiya Arabistonida o‘tkaziladigan xalqaro Qur’oni karim musobaqasida qorilarimiz qatnashadi
Shu yilning 7-11 sentyabr kuni Qur’oni karimni yoddan o‘qish va tafsir qilish bo‘yicha Saudiya Arabistonining Makka shahrida 41 xalqaro Qur’oni karim musobaqasi o‘tkaziladi.
Mazkur musobaqa quyidagi 4 yo‘nalishda bo‘lib o‘tadi:
- Qur’oni karimni tajvid qoidasi bilan to‘liq yoddan o‘qib berish bilan birga Qur’oni karim so‘zlarining ma’nolarini bilishi.
- Qur’oni karimni tajvid qoidasi bilan to‘liq yoddan o‘qib berish.
- Qur’oni karimning 15 porasini tajvid qoidasi bilan yoddan o‘qib berish.
- Qur’oni karimning 5 porasini tajvid qoidasi bilan chiroyli ohangda o‘qib berish. Bu yo‘nalish Islom hamkorlik tashkilotiga a’zo bo‘lmagan va musulmonlar kamchilik bo‘lgan davlatlar ishtirokchilari uchundir. Musulmon davlatlar vakillari ushbu yo‘nalishda qatnasha olmaydi.
Ma’lum qilinishicha, bu yilgi musobaqada 103 ta davlatdan 146 nafar vakillar ishtirok etadi.
Yurtimizning 2 nafar vakili Toshkent islom instituti talabasi Husniddinov Zuhriddin qori va Buxoro shahridagi “Mir Arab” oliy madrasasi talabasi Orifjonov Abduraufxon mazkur musobaqada ishtirok etish uchun shu yilning 3 sentyabr kuni Saudiya Arabistoniga jo‘nab ketdi.
Xalqaro aloqalar bo‘limi xodimi
Toshkent islom institutida ilk bor "Oilaviy ochiq eshiklar kuni" o‘tkazildi (foto+)
Xalqaro oila kuni, yaqinlashayotgan qutlug‘ Qurbon hayiti hamda 1 iyun — Bolalarni himoya qilish kuni munosabati bilan Toshkent islom institutida ta’lim muassasasi tarixida ilk bor «Oilaviy ochiq eshiklar kuni» tashkil etildi. Instituti hovlisida o‘zgacha quvonch va samimiyat muhitini ulashgan ushbu fayzli tadbirni ta’lim muassasasi rektori Uyg‘un G‘afurov kirish so‘zi bilan ochib berdi.
Tadbir doirasida institutda faoliyat yuritayotgan professor-o‘qituvchilar va xodimlarning 200 nafardan ziyod farzandlari hamda nabiralari uchun unutilmas bolalar sayli uyushtirildi.
Mazkur tashabbusdan ko‘zlangan asosiy maqsad — bolajonlarning o‘z ota-onalari mehnat qilayotgan tabarruk ilm dargohi va bu yerdagi ma’rifiy muhit bilan yaqindan tanishishi hamda qalbida ilm ahliga nisbatan yuksak hurmat-ehtirom tuyg‘usini shakllantirishdan iboratdir.
Bayram dasturi doirasida bolajonlar uchun «Shirinliklar bayrami» tashkil etilib, milliy o‘yinlar, rasm chizish, xattotlik, shaxmat-shashka va stol tennisi kabi sport musobaqalari o‘tkazildi.
Shuningdek, qizlar uchun milliy hunarmandchilik mahorat darslari, sayyor attraksionlar va multfilmlar namoyishi bolajonlarga haqiqiy quvonch ulashdi. Tantanali tadbir yakunida institut ma’muriyati tomonidan barcha ishtirokchilarga maxsus bayram sovg‘alari va shirin tushliklar taqdim etildi.
Ota-onasining jamiyat uchun manfaatli mehnatidan faxrlangan bolajonlarning chehrasidagi beg‘ubor tabassum ushbu xayrli va ma’naviy tadbirning eng katta yutug‘i bo‘ldi. Zero, oilasi ahil, farzandlari baxtiyor bo‘lgan yurtning kelajagi hamisha nurli va barqarordir.
O‘zbekiston musulmonlari idorasi
Matbuot xizmati
