O‘zbekistonlik hojilar ulug‘ ibodat manosiklarining asosiylarini ado etib, Mino vodiysidan Makka shahridagi mehmonxonaga qaytdilar. Yetti mingdan ziyod yurtdoshimiz dunyodagi millionlab dindoshlari qatori zimmalaridagi Allohning farzi – haj amallarini bajardilar.
“Haj – 2019” ishchi guruhi hojilarning ibodatlari dinimiz talablariga muvofiq, qiyinchiliksiz va talafotlarsiz o‘tishi uchun hamma ishni qilib, bor kuch-g‘ayratlarini safarbar etdilar.
Hojilarimiz buyuk ibodat, poklanish, bandalikni izhor qilish orqali dunyo hayotida bilib-bilmay qilgan gunohlarini avf etishi va rahmatini so‘rab, Alloh azza va jallaga iltijo qildilar.
Hojilar Makkai mukarramada Hazrati Ibrohim, Hazrati Ismoil alayhimussalom va Hazrati Muhammad sollallohu alayhi vasallam yurgan yerlarini ziyorat etdilar. Arafot ma’rifatga, Muzdalifa shuurga erishish joyi ekanini anglab yetdilar. Arafotda turish – mahsharning bu dunyodagi kichik bir ko‘rinishi ekanini tushunib yetdilar.
Mino vodiysidagi minglab chodir barcha shahar va qishloqlarning qadridan ustun ekanini fahm etdilar. Minoda shayton bilan mujodala etish uchun tosh otish va qurbonlik so‘yib, hazrati Ibrohim va Ismoilning itoatkorligidan o‘rnak olish imkoni katta saboq bo‘ldi.
Shaytonni toshbo‘ron qilish yomonliklarni inkor qilishdir. Haj ibodatining yakuniga yetib kelayotgan hoji bu sa’y-harakati ila shaytonga va uning yo‘liga ergashganlarga o‘zining nafratini izhor etdi.
Tili, rangi, millati, madaniyati turlicha bo‘lgan millionlab mo‘min-musulmonlar bir tanu bir jon bo‘lib ado etgan muborak haj ana shunday muhim ahamiyatlarga egadir. Ibodat niyati ila muqaddas yerlar tomon qilingan ushbu safar kishiga o‘zining hayotini yangidan sarhisob qilish, o‘zlikni anglash imkonini berdi.
Rasuli Akram sollallohu alayhi vasallamga ko‘ra, haj ibodatini mukammal ado etgan kishining mukofoti jannatdir. Yosh to‘la ko‘zlarini, poklanib, top toza bo‘lib qolgan qalbini Allohning Baytidan uza olmay, o‘z ona-Vataniga qaytishga chog‘langan hoji endi mutlaqo boshqa insondir.
Biz barcha hojilarning hajlari mabrur, ibodatlari maqbul bo‘lishini Alloh taolodan so‘raymiz.
O‘zbekiston musulmonlari idorasi Matbuot xizmati
#xabar #haj2025
Ayni kunlarda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari Makka shahrida bo‘lib turgan Qoraqalpog‘iston Respublikasi, Toshkent shahri va vodiy viloyatlarining bo‘lg‘usi hojilarilariga suhbatni qilib berdilar.
Muftiy hazratlari ma’ruza avvalida ziyoratchilarimizga bu diyorda Haq taolo vahiy nozil qilgani, Rasul alayhissalom, sahobalar yashaganlari, shu bois bu yerning hurmatini saqlash, shukr va zikrni ko‘paytirish, toat-ibodat, yaxshiliklarda bardavom bo‘lish, gunoh-ma’siyatlardan esa butunlay saqlanish lozimligini bayon etdilar.
Dildan qilingan suhbat chog‘ida Shayx Nuriddin Xoliqnazar hazratlari Haq taolo O‘zining ibodatiga chaqirgan barcha bandalarini yaxshi ko‘rishi, Robbimiz muqaddas makonda duoga ochilgan qo‘llarni quruq qaytarishdan hayo qilishi, shu bois duolarni ko‘p va xo‘p qilishi kerakligi, bunda ona-Vatanimiz, davlatimiz Rahbari va yurtdoshlarimizni-da unutmaslikni alohida ta’kidladilar.
Shuningdek, Muftiy hazratlari mabrur haj, ya’ni hech qanday gunoh aralashmagan, qabul bo‘lgan haj qanday bo‘lishi, bunda tavba, ixlos, halol-pok mol, ehromning talablariga amal qilish, ibodatni chiroyli ado qilish, zikru tasbehni ko‘paytirish lozimligiga urg‘u qaratdilar.
Suhbat so‘ngida qalblari yorishib, ko‘zlari namlangan ziyoratchilarimiz Muftiy hazratlarining barchaning haji mabrur bo‘lishi, yurtimiz tinchligi, xalqimiz farovonligi, ertamiz egalari bo‘lgan farzandlarimizning baxtu iqbolini so‘rab qilgan duolariga omin, deya qo‘l ochdilar.
Ayni kunlarda Makka shahridagi mehmonxonalarda ulamolar, imom-xatiblar va ellikboshilar tomonidan haj ibodatiga oid ilmiy-ma’rifiy suhbatlar hamda savol-javoblar davom etmoqda.
O‘zbekiston musulmonlari idorasi
Matbuot xizmati