7 avgust kuni O‘zbekiston musulmonlari idorasi raisi, muftiy Usmonxon Alimov hazratlari Makka shahridagi o‘zbekistonlik ziyoratchilar joylashgan mehmonxonada tashkil etilgan tibbiyot markazi faoliyati bilan yaqindan tanishib, muolaja olayotgan ziyoratchilar holidan xabar oldilar.
Ma’lumki, yurtimizdan borgan 35 nafar malakali shifokor ziyoratchilarga tunu kun xizmat ko‘rsatmoqda. Tibbiyot markazida 40 o‘ringa mo‘ljallangan yotoqlar hozirlangan, mazkur markazga 140 million so‘mlik dori-darmon mahsulotlari yetkazib berilib, tibbiy vositalar bilan jihozlangan. Tibbiyot markazining 20 o‘rni ayollar uchun mo‘ljallangan bo‘lib, ularga 10 nafar ayol shifokor xizmat ko‘rsatmoqda.
Muftiy hazratlari shifokorlar bilan suhbatda, ziyoratchilar salomatligiga juda katta e’tibor qaratish zarurligi, eng tezkor uslubda muolaja qilish choralarini ko‘rish lozimligi va dori-darmon vositalarini to‘g‘ri qo‘llash bo‘yicha muhim tavsiyalarni berdilar. Chunki, ziyoratchilarning sog‘lom va o‘zlarini bardam his etishlari ularning ibodatlari to‘la-to‘kis ado etishlariga asosiy omil ekanini muftiy hazratlari alohida ta’kidladilar.
Muolaja olayotgan ziyoratchilar bilan suhbatlashganda, o‘zbekistonliklar uchun yaratilgan shart-sharoitlar havas qiladigan darajada ekani, bevosita mehmonxonaning o‘zida tibbiyot xizmati tashkil etilgani juda ham katta qulaylik bo‘layotgani, tibbiy yordamga ehtiyoj sezganda, ortiqcha mashaqqat chekishga hojat yo‘qligi, shifokorlar ham o‘z ishini ustasi va shirinso‘zligini alohida ta’kidlashdi.
Chindan ham, hali biror bir mamlakat ziyoratchilar uchun mehmonxonaning o‘zida bu darajada tibbiy xizmat yo‘lga qo‘ymagan. Endigina MDH davlatlarining ayrimlarida shifokorlar muborak safarga jalb etilayotgan ekan.
O‘z navbatida aytish kerakki, shifokorlar guruhi tomonidan ziyoratchilar bilan suhbatlar o‘tkazilib, bu yilgi haj mavsumi yilning nisbatan issiq paytiga to‘g‘ri kelgani, bunday kezlarda oftob urishidan saqlanish, ko‘proq suyuqlik ichish, soyabon tutib yurish zarurligi haqida tushunchalar berilyapti.
Ziyoratchilarimiz salomatligini asrashda tibbiyot xodimlarining o‘rni nihoyatda muhimligini e’tirof etgan holda, bunday tajribali hamda o‘z vazifasiga mas’uliyatli soha fidoyilarining xizmati katta ekanini alohida e’tirof etamiz.
O‘zbekiston musulmonlari idorasi Matbuot xizmati
O‘zbekiston Respublikasi Prezidenti
Shavkat Mirziyoyev Janobi Oliylariga
Bismillahir Rohmanir Rohim
Assalomu alaykum va rahmatullohi va barakotuh
Muhtaram Prezident Janobi Oliylari!
Alloh taologa behisob shukrki, Sizning bevosita tashabbuslaringiz va sa’y-harakatlaringiz bilan haj amallarini yuqori saviyada tashkil etishga muvaffaq bo‘lmoqdamiz.
Bunday e’tibor va ehtiromni biz hojilar chin yurakdan his etib, yaratilgan barcha qulayliklar uchun Sizga chuqur minnatdorlik izhor etamiz.
Hurmatli Prezident Sizni va Siz orqali yurtdoshlarimizni haj ibodatini ado etayotgan hamyurtlarimiz nomidan musulmon ummati uchun eng ulug‘ bayram – Qurbon hayiti bilan samimiy muborakbod etamiz.
Zero, Payg‘ambarimiz (sollallohu alayhi vasallam) “Duolarning eng yaxshisi arafa kuni qilingan duodir”, deb xushxabar berganlar.
Alloh taoloning bayti joylashgan muqaddas zaminda – Mino, Arafot kabi muborak manzillarda ulug‘ amallarni ixlos ila bajarmoqdamiz.
Sizni vaqt ajratib, muborak haj ziyorati uchun yaratilgan sharoitlar va salomatligimiz haqida so‘raganingiz hamda har kuni holimizdan xabardor bo‘lib turganingiz ibodat bilan yurgan biz hojilarni cheksiz darajada mamnun etdi.
Bunday e’tibor va ehtiromni Saudiya Arabistonining mutasaddilari ham yuqori baholab, Siz Janobi Oliylariga hurmat va duolarini izhor etmoqdalar.
Muborak maskanlarda har bir ziyoratchi Sizning g‘amxo‘rligingizni yurakdan his qilib, ko‘zlarida yosh bilan duolar qilayotganini alohida aytib o‘tmoqchiman.
Sizga aytadigan yana bir xabarimiz, Saudiya Arabistonida bo‘lib turgan yurtimizning diniy soha vakillari hamda ziyoratchilari tomonidan mavsum davomida Qur’oni karim 10 ming marotaba xatm qilinib, yurtimizga tinchlik, xalqimizga farovonlik tilab duolar qilindi.
Hurmatli Prezident, Siz yaratib bergan imkoniyatlardan ruhlanib, o‘zbekistonlik hojilar yurtga qaytganimizdan keyin “Yangi O‘zbekistonning tinchlik va ma’naviyat targ‘ibotchilari” degan ezgu tashabbusni bir ovozdan ilgari surib, Uchinchi renessans yaratuvchilarini tarbiyalashda Sizga ko‘makchi bo‘lmoqchimiz.
Siz boshchiligingizda yurtimizda tinchlikni mustahkamlash, xalqimizning ma’naviyatni yuksaltirish, ayniqsa yoshlarning sifatli ta’lim olishi, kasb-hunar egallashi, kerak bo‘lsa dunyoni egallashi kabi masalalar eng ustuvor vazifaga aylandi.
Shunday ekan, biz hojilar yurtimizga qaytgach, quyidagi ishlarni amalga oshirmoqchimiz:
– ona-Vatanimiz taraqqiyotiga xolis xizmat qilish, mahallalarda tinchlik va birdamlikni mustahkamlash, aholi orasida tinchlik-osoyishtalikni qadriga yetish, xalqimizni ma’nan yuksaltirish, jamiyatdagi islohotlarga daxldorlik hissini oshirish kabilarga targ‘ib etish;
– kitobxonlik madaniyatini yuksaltirish, ilmni qadrlash va ilm-ma’rifatga homiylikda namuna bo‘lish;
– to‘ylar, oilaviy tadbirlar va marosimlarda me’yoriylikka amal qilgan holda kamxarj va ixcham o‘tkazishda bosh-qosh bo‘lish;
– kiyinishda va muomalada oddiylik va kamtarinlikka amal qilish, dabdababozlik, isrofgarchilik, maishatbozlik kabi illatlardan yiroq bo‘lishni targ‘ib qilish;
– yoshlarni muvaffaqiyatlarga faqat o‘qib-o‘rganib, ilm bilan erishish mumkinligini o‘rgatish;
– ustozlar, o‘qituvchi va murabbiylarga doimo ehtirom ko‘rsatish, ularni moddiy qo‘llab-quvvatlash ishlariga ko‘mak berish;
– mahallalardagi notinch oilalar, shu jumladan tarbiyasida muammosi bor yoshlar o‘rtasida tushuntirish ishlarini olib borish;
– hududlardagi maktablarning ta’mirga muhtoj qismini joriy ta’mirlash ishlariga ko‘maklashish;
– xayriya, mehr-muruvvat va yordam ko‘rsatish ishlarini ko‘paytirish.
Barcha hojilarimiz yurtimizga qaytgandan so‘ng ushbu tashabbuslarni qat’iy amalga oshirishga va’da beramiz.
Zero, jonajon Vatanimiz kelajagi, xalqimiz farovonligi va yurtimiz shonu shuhrati Siz aytganingizdek yoshlarimiz qo‘lidadir. Ular ertaga O‘zbekistonni yanada kuchli, yuksak taraqqiy etgan davlatga aylantirish uchun o‘zlarining bor bilimi, iqtidori va kuch-g‘ayratini safarbar qilsa, ko‘zlagan barcha ezgu maqsadlarimizga, albatta erishamiz.
Yusuf Xos Hojib bobomiz aytganlaridek:
“Zakovat bor joyda ulug‘lik bo‘ladi,
Bilim bor joyda buyuklik bo‘ladi”.
Hurmatli Prezident Janobi Oliylari!
Biz, 15 ming hoji duolar ijobat bo‘ladigan Arafotda turib, Alloh taolodan Sizga mustahkam sog‘lik, uzoq umr va ulkan muvaffaqiyatlar tilab, olib borayotgan barcha ishlaringizda madadkor bo‘lishini so‘rab iltijolar qilyapmiz.
Alloh taolo butun dunyo mo‘min-musulmonlariga Qurbon hayitini muborak aylasin, tinchlik-xotirjamlik ato etsin, ibodatlarimizni O‘z dargohida husni qabul aylasin, ona Vatanimizni obod, xalqimiz hayotini yanada farovon qilsin!
Qurbon hayiti muborak bo‘lsin!
Hurmat va kamoli ehtirom ila,
O‘zbekiston hojilari,
Makka shahri Arafot vodiysi,
2025 yil 5 iyun