O‘tgan yili qozog‘istonliklarning haj safariga harajatlari 4200 AQSH dollarini tashkil etgan bo‘lsa, joriy yilda 3200 nafar ziyoratchilarning haj amallarini bajarish uchun 4800 AQSH dollarini to‘lashlariga to‘g‘ri kelmoqda.
Qozog‘iston bosh muftiysi Serikbay hoji Oraz Zakon.kz saytiga bergan intervyusida bu yilgi haj narxlarining oshishini izohlab berdi. Uning aytishicha, bo‘lajak hojilarga xizmat ko‘rsatadigan turkompaniyalar ularning har biridan o‘z xizmatlari uchun taxminan 50 ming tangadan olishadi.
“Turkompaniyalar uchta paket: Standart/ekonom, Komfort/luks va VIP paketlari bo‘yicha xizmatlarni taklif etishadi. Tanlangan paketga qarab, hajning narxi belgilanadi. Qolgan barcha harajatlar haj safariga borganlarning aviaqatnovlari, Saudiya Arabistonida ko‘rsatiladigan transport xizmatlari, zamonaviy, barcha qulayliklarga ega mehmonxonalarga joylashtirish, ovqatlanish, ziyoratgohlarga ekskursiya uyushtirish, haj amallarini bajarishga yordam berishlariga sarflanadi.
Avvallari Saudiya Arabistoni Standart/ekonom paketi borganlardan pul olmasdi, endi esa ulardan ham 300 AQSH dollaridan olmoqda. Oxirgi yillarda Nur-Sulton, Olma-Ota, Chimkent va Oqtov shaharlaridan Saudiya Arabistoniga to‘g‘ridan to‘g‘ri aviaqatnovlar yo‘lga qo‘yildi. Oldinlari fuqarolarimiz hajga Istanbul, Sharja, Dubay orqali borishar, bu ko‘p vaqt olar va asablanishlarga sabab bo‘lar edi.
Bizning ziyoratchilarimizga xizmat ko‘rsatadigan «Fly Nas» Saudiya aviakompaniyasi ularni olib ketish uchun bo‘sh uchib keladi. Bu ham narxga ta’sir qiladi”, - deydi bosh muftiy.
Uning bildirishicha, bundan tashqari, Saudiya Arabistonidagi transport xarajatlarining narxi uch marotabaga ko‘tarildi, shunga yarasha xizmat sifati ham oshdi.
“Qo‘shni mamlakat fuqarolari uchun haj safarlari arzon tushayapti, degan gaplarga xizmat ko‘rsatishning sifati nuqtayi nazaridan baho berish kerak. Qirg‘izistonlik ziyoratchilar 90-yillardan beri Saudiya xayriya jamg‘armalari hisobidan bepul mehmonxonalar bilan ta’minlanadi. Ammo ushbu mehmonxonalar Makkadagi al-Haram masjididan ancha uzoqda joylashgan. Bu esa ushbu masjidga ziyoratchilarning yetib kelishi uchun ancha qiyinchilik tug‘diradi. O‘zbekistondagi haj xarajatlari esa biznikidan unchalik katta farq qilmaydi”, - o‘z so‘zini yakunladi Serikbay hoji Oraz.
O‘zbekiston musulmonlari idorasi Matbuot xizmati
Madina shahrida Payg‘ambarimiz Muhammad sollallohu alayhi va sallam bilan bog‘liq bo‘lgan bir necha o‘nta muqaddas joylar mavjud. Ulardan biri — Banu Unayf masjidi bo‘lib, u Kubo masjididan janubiy-g‘arbiy tomonga, al-U’sba mahallasiga 500 metrdan yaqinroq bo‘lgan masofada joylashgan.
IQNA axborot agentligi Saudiya Arabistonining “VAS” agentligiga tayanib xabar berishicha, ushbu tarixiy masjid o‘z nomini Kubo ahli bilan ittifoqchi bo‘lgan Bali qabilasining tarmog‘i — Banu Unayf qabilasi nomi bilan atagan.
Ba’zi tarixchilar ushbu masjidni ”As-Subh” yoki “Al-Musabbah” nomlari bilan ham bilishadi. Masjid o‘zining asl va sodda me’morchiligi bilan tanilgan: u qora tusli vulqon toshlaridan qurilgan va uning tom qismi yo‘q. Masjid maydoni taxminan 37,5 kvadrat metrni tashkil qiladi.
Madina mintaqasini rivojlantirish boshqarmasi tomonidan Payg‘ambarimiz sollallohu alayhi va sallam bilan bog‘liq joylarni saqlash va Saudiya Arabistonidagi “Nigoh – 2030 dasturi” maqsadlariga muvofiq ravishda ushbu masjid kapital ta’mirdan chiqarildi.
Banu Unayf masjidi madaniy va diniy turizm loyihalariga kiritilgan bo‘lib, Madina mintaqasini rivojlantirish boshqarmasi uni amalga oshirishni nazorat qilmoqda. Bu esa ziyoratchilarni Madinadagi tarixiy va diniy joylar bilan tanishtirishga qaratilgan kompleks yondashuvning bir qismi sanaladi.
Manbalar asosida
Ilyos Ahmedov tayyorladi