Nursulton shahridagi “Hazrat Sulton” masjidi imomi Maqsatbek Qairg‘aliyev navbatdagi haj mavsumiga bag‘ishlangan matbuot anjumanida nima uchun qarz-havola qilib haj amalini bajarib bo‘lmasligini izohlab berdi.

“Islom dinining shartlaridan biri bo‘lmish haj amalini bajarish uchun birovdan qarz yoki kredit olib bo‘lmaydi. Negaki, haj safari xarajatlariga va safarga borib kelgunicha farzandlarini xarajatlariga yetadigan mablag‘ga ega bo‘lgan kishigagina haj farz bo‘ladi. Ya’ni, shu xarajatlarni qoplashga imkoniyati bor kishigina haj amalini bajarishi mumkin”, - dedi imom.

Uning fikriga ko‘ra, bunga u ham moddiy, ham ruhiy, ham sog‘liq jihatdan tayyor bo‘lishi kerak.

“Hozir shunday imkoniyatga ega emas ekan, u keyingi yilgacha pul to‘plashi va haj amalini bajarsa bo‘ladi. Tashqaridan mablag‘ jalb qilish, kimdandir qarz olishga ehtiyoj yo‘q”, dedi Maqsatbek Qairg‘aliyev.
Aytilishicha, shu yilning 31 iyulidan 20 avgustga qadar Qozog‘istondan ajratilgan kvota bo‘yicha 3200 nafar inson haj amalini bajaradi. Bo‘lajak hojilarga qozog‘istonlik «Scat» va saudiyalik «FlyNas» aviakompaniyalari xizmat ko‘rsatishadi. Birinchi reys Oqtov va Chimkent shaharlaridan bo‘lishi rejalashtirilgan.

O‘zbekiston musulmonlari idorasi Matbuot xizmati