Kuni kecha 9 iyul kuni Hadis ilmi maktabiga 2019-2020 o‘quv yili uchun “Hadis va mustalahul hadis” va “Arab tili” fanlaridan ijodiy imtihon bo‘lib o‘tdi. Imtihon olish uchun Hadis ilmi maktabi, O‘zbekiston xalqaro islom akademiyasi, Toshkent islom institutidan jami 12 nafar yetakchi professor-o‘qituvchilar jalb etildi. Ijodiy imtihonlarda 53 nafar abituriyent ishtirok etmoqda.
Ijodiy imtihon sinovlari jarayonida O‘zbekiston musulmonlari idorasi raisi, muftiy Usmonxon Alimov hazratlari, Din ishlari bo‘yicha qo‘mita raisining birinchi o‘rinbosari Muzaffar Komilov, diniy-ma’rifiy ta’lim muassasalari bilan ishlash bo‘limi boshlig‘i Bobomurod Rustamov, Diniy idora ta’lim va kadrlar tayyorlash bo‘limi mudiri Salohiddin Sherxonov kuzatuvchi sifatida ishtirok etdilar hamda imtihonlar xolis, shaffof va adolatli o‘tishini nazorat qildilar.
Bugun, 10 iyul kuni Hadis ilmi maktabiga kirish imtihonlarining ikkinchi kuni, “O‘zbekiston tarixi” fanidan test sinovlari soat 8:30 da boshlandi. Test sinovlarida 51 nafar abituriyent qatnashdi.
Test sinovlari hujjatlari solib muhrlangan maxsus qop abituriyentlar hamda kuzatuvchilar guvohligida ochildi. Abituriyentlarga imtihon hay’ati a’zolari tomonidan test sinov varaqalarini to‘ldirish qoidalarini tushuntirildi.
Shuningdek, imtihon va test sinovlariga Payariq tumani Ichki ishlar bo‘limi xodimlari va Payariq tumani Tez tibbiy yordam xodimlari jalb qilinib, zarur bo‘lgan holatda abituriyentlarga zaruriy tibbiy yordam ko‘rsatish choralari ko‘rildi.
Test sinovi jarayonlarining adolatli, shaffof va xolis o‘tishi to‘liq ta’minlanmoqda.

O‘zbekiston musulmonlari idorasi Matbuot xizmati