2019 yil 5 iyul, muborak juma kuni Surxondaryo viloyati Boysun tumanidagi Omonxona qishlog‘ida yangi “Shayx Shamsiddin” nomidagi masjidi ochildi. Qishloq aholisining sevinchi cheksiz. Tillari-yu dillari shukronada, duoda. Avvallari masjid uchun 12 km uzoqlikdagi tuman markaziga borishiga to‘g‘ri kelar, marosimlar, to‘y-ma’rakalarda qiyinchilikka duch kelinar edi.  Ko‘p yillik armonlar bugun barham topdi. Endi ularning o‘z masjidlari, imom-xatiblari bor.

O‘zbekiston musulmonlari idorasi raisi o‘rinbosari Ibrohim domla Inomov hudud aholisini yangi ro‘yxatdan o‘tgan masjid bilan muborakbod etdilar. Muftiy hazratlarining ezgu tilaklari, duoi xayrlarini  yetkazdilar.

 Yurtimizda olib borilayotgan islohotlarning tub mohiyati avvalo insonlarni rozi qilish, ularning og‘irini yengil qilishdir. Aslida XX asr boshlarida qurilgan, biroq o‘tgan davr mobaynida turli sabablar bilan yopib qo‘yilgan ushbu masjidni ochish uchun bir qancha jonkuyar ixlos egalari ko‘p ter to‘kdilar. Barcha zaruriy hujjatlarni tayyorladilar. Masjid binosi hashar yo‘li bilan qayta ta’mirlanib, yangi tahoratxona qurildi. So‘nggi yillarda diniy-ma’rifiy soxada olib borilayotgan islohotlar samarasining yana bir isboti o‘laroq masjid ochilib, qishloq ahli, ayniqsa, nuroniy keksalarning shodligiga sabab bo‘lmoqda. Zero masjidlardan Alloh taoloning rahmat nurlari taralib turadi. Ibodat, ma’rifat, birodarlik maskani bo‘lib, musulmonlar e’tiqodini mustahkamlashga, axloqining go‘zallashishiga, yomonliklardan uzoqda bo‘lishiga sabab bo‘ladi.

Ibrohim domla Inomov masjidda birinchi juma namozini ado etib berdilar. Allohning baytida toat-ibodatlar, solih amallar, Qur’oni karim tilovati Qiyomat qadar davom etishini tiladilar. Shuningdek, tashkiliy ishlarda faollik ko‘rsatgan pok niyatli kishilar haqqiga duolar qildilar.

Shu bilan O‘zbekistondagi masjidlar soni 2060 taga yetdi. Eslatib o‘tamiz, shu yilning o‘zida Toshkent shahrida “Shayx Muhammad Sodiq Muhammad Yusuf”, “Fayzullaxo‘ja o‘g‘li Murodhoji”, Termiz shahrida “Hakim Termiziy” nomidagi yangi masjidlar ochilgani edi.

O‘zbekiston musulmonlari idorasi Masjidlar bo‘limi