Qashqadaryo viloyatida o‘tkazilgan Xalqaro press klubning navbatdagi yig‘ilishi "O‘zbekistonda oliy ta’lim tizimi: islohotlarning yangi bosqichi, muammolarning chuqur tahlili va tezkor yechimlar" mavzusiga bag‘ishlangan edi. Ushbu yig‘ilishda Qashqadaryo va Surxondaryo viloyatlarida faoliyat yuritayotgan oliy ta’lim muassasalari rahbarlari va talabalar hamda keng jamoatchilik ishtirok etdi.

Yig‘ilishda Oliy Majlis Senati a’zosi, Termiz davlat universiteti rektori Abduqodir Toshqulov ta’lim tizimiga bog‘liq bo‘lgan muammolar haqida munosabat bildirib quyidagi fikrlarni bildirdi: «Bu katta savolni berishdan avval, siz globalroq javob kutdingiz. Vaqtida Termiz shahri Termiziylar va ularning ilm-fani bilan dunyoni lol qoldirgan, dunyoga bo‘y cho‘zgan. Xuddi shunday Kesh, sohibqiron Amir Temur, u tuzgan davlat, davlatchilik, olimlarning faoliyati haqida gapirdingiz...

Masalaga bir misol bilan yondashsak, yaqinda universitet xalqaro bo‘limi boshlig‘i xabar berib qoldi, Termiz shahriga Pokiston va Hindistondan 70 nafarga yaqin allomalar kelishgan. Ular Termizning ulug‘ shahar ekani, bu yerliklar muqaddas zaminda yashashini aytishdi. Biroq ulamolar xalqning yuziga, ko‘ziga boqqanida qalbda ilm sustligini ko‘rishganini aytishgan. Biz maqbarani chiroyli qilib qo‘ydik, qani al-Hakim at-Termiziy? Qani "Sunani Termiziy"ning keyingi tomlari? Aksariyat hollarda insonlar ko‘r-ko‘rona ziyoratini yo‘lga qo‘ydik. Yozav-chizuvning ko‘pligi, g‘iybat, g‘urbat hamda korrupsiya holatlari ko‘p bo‘lgan. Ustoz-shogirdlar va jamoa o‘rtasidagi xasad ilmiy salohiyatning tushib ketishiga sabab bo‘ldi. Bunday ma’naviy hastaliklarning ko‘pligiga sabab nima? Men bitta sabab keltiraman.

Biz yuz yil davomida Oliy ta’limdan Islomni sug‘urib oldik. Halol bilan haromni sug‘urib oldik. Biz Hyoteni o‘rgatdik, lekin janoi Payg‘ambarimiz (s.a.v.)ning hadislaridan keltirishga cho‘chidik» deya fikrini davom ettirdi Rektor.

"Biz Islom ma’rifatini faqat imomlar gapirsin dedik, dunyoviy ilm olganlar bu haqda gapirsa unga boshqacha qaradik".

Firklarning to‘liq shakli bilan videolavha orqali tanishishingiz mumkin.

O‘zbekiston musulmonlari idorasi Matbuot xizmati