Yil boshidan buyon qor-yomg‘irli kunlarga qaramay, Shayx Muhammad Sodiq Muhammad Yusuf rohimahulloh nomlari uchun barpo etilayotgan majmuada qurilish ishlari bir lahza bo‘lsin-da, to‘xtagani yo‘q. Bir yildan ortiq vaqt davomida olib borilgan qurilish, nihoyat o‘z yakuniga yetish arafasida.

Majmua tarkibidagi masjidga kirish joyidagi muhtasham ichki va tashqi peshtoq to‘la qurib bitkazildi.  Majmuani bezab turadigan ikkita minora ustiga kichik gumbazlar o‘rnatildi. Masjid ichidagi bezak ishlari yakuniga yetish arafasida.

Majmuadagi anjumanlar saroyi, minoralarning qurilish ishlari yakuniga yetdi hamda ularning qubbasiga hilol o‘rnatildi.

Shuningdek, “So‘galli ota” maqbarasida  ham bunyodkorlik ishlari o‘z yakuniga yetdi. Masjid hududidagi namozxona, ayollar namozxonasi, tahorat xonalari, minora, 3 ta kirish peshtoqi, 200 o‘ringa mo‘ljallangan anjumanlar saroyi, tashqi va ichki favvoralar, majmua sahni, avtoulovlar uchun to‘xtash joylarida qurilish va bezak berish ishlari yakunlandi.

Majmua hovlisi to‘liq ko‘kalamzorlashtirildi, shuningdek tashrif buyuruvchi ziyoratchilarga qulayliklar yaratish maqsadida zamonaviy rusumdagi o‘rindiqlar, chiqindi qutilari o‘rnatildi.

Majmua hududida bunyod etilgan muzeyda esa Shayx Muhammad Sodiq Muhammad Yusuf rohimahullohning umr yo‘liga oid qimmatli ma’lumotlar, u kishining ilmiy merosini jamlash rejalashtirilgan.

Tez kunlarda majmuaning foydalanishga topshirilishi kutilmoqda.

islom.uz portali tahririyati

Manba: https://islom.uz