“Yo‘qotgan kitoblarimga achinayotgan edim, mana, bugun ular ham qaytib keldi!”
Avval xabar berganimizdek, muftiy hazratlari Toshkent shahar, Shayxontohur tumani “Oqlon” mahallasidagi uylari yonib ketgan sakkizta xonadonga tashrif buyurib, talofatdan aziyat chekkan xonadon ahllariga hamdardlik bildirgan edilar.
O‘zaro suhbat davomida xonadon ahllaridan birlari: “Eng achinarlisi, men uchun bebaho boylik bo‘lgan ko‘plab kitoblarim ham yong‘inda yonib ketdi. Ularning aksariyati diniy kitoblar edi”, deya nafsus bilan so‘zlab bergan edi. Muftiy hazratlari yo‘qotilgan kitoblar o‘rnini to‘ldirilishini o‘z zimmalariga olib, albatta yetkazib berilishini ta’kidlagan edilar.
Bugun ana shu xonadonlarga muftiy hazratlarining va’dalari yetkazildi. O‘zbekiston musulmonlari idorasi Masjidlar bo‘limi mudiri Muhammadnazar domla Qayumov sakkizta xonadonning har biriga Qur’oni karim va o‘ndan ortiq, jami yuzga yaqin diniy-ma’rifiy kitoblarni muftiy hazratlari nomlaridan topshirdilar. Bundan tashqari, tez orada diniy idora tarafidan moddiy yordam ham ko‘rsatilishini bildirdilar.
“Allohga shukurki, mahalla ahli bugun hammalari bizga yordam ko‘rsatmoqda. Bu borada alhamdulillah, ko‘nglimiz taskin topyati. Faqat men yo‘qotgan kitoblarimga achinayotgan edim, mana bugun ular ham qaytib keldi! Muftiy hazratlari bizga Qur’oni karim va boshqa ko‘plab mo‘tabar kitoblarni yuboribdilar. Alloh taolo hazratimizni O‘z panohida asrasin. Boshiga sinov tushgan barcha insonlar nomidan u kishiga katta minnatdorchiliklarimizni bildiramiz”, deydi Fathulloh hoji ota.
Mo‘minlarning bir-birlarini musibat onlarida yolg‘izlatib qo‘ymaslik, dardlariga malham bo‘la olishlik bu dinimiz va oliyjanob xalqimizning go‘zal an’analaridandir. Alloh atolodan musibat yetgan xonadon ahillariga najot va barakotlar berishini so‘rab qolamiz.
O‘zbekiston musulmonlari idorasi Masjidlar bo‘limi
Xalqaro forum: Islomiy moliya va sukuk bozorlari diqqat markazida
Bugun, 16 iyun kuni poytaxtimizda start olgan «Investitsiyalar barqarorligi: yangi ufqlar, yangi hamkorliklar» mavzusidagi Beshinchi Toshkent xalqaro investitsiya forumi doirasida «Toshkent» zalida muhim panel sessiyasi bo‘lib o‘tdi.
«Islomiy moliya va sukuk bozorlari: Ko‘rfaz kapitalini rivojlanayotgan iqtisodiyotlarga yo‘naltirish» mavzusiga bag‘ishlangan ushbu sessiyada xalqaro va mahalliy ekspertlar, moliyaviy tashkilotlar va davlat sektori vakillari ishtirok etdi.
Bugungi kunda jahon islomiy moliya bozorining hajmi 3 trillion AQSH dollaridan oshib ulgurdi. Sessiya davomida islomiy moliyaning asosiy vositalari hisoblangan sukuk (islomiy obligatsiyalar), takaful (islomiy sug‘urta) va shariat tamoyillariga muvofiq bo‘lgan boshqa moliyaviy tuzilmalar rivojlanayotgan bozorlar, xususan, O‘zbekiston iqtisodiyoti va infratuzilma loyihalariga suveren kapitalni jalb qilishda qanday rol o‘ynashi mumkinligi atroflicha tahlil qilindi.
Islom taraqqiyot bankining O‘zbekistondagi vakili Xusan Xasanov moderatorlik qilgan davra suhbatida yangi moliyaviy mahsulotlar dizaynini yaratish, milliy qonunchilik va tartibga solish tizimini xalqaro shariat standartlari bilan uyg‘unlashtirish hamda yangi emissiyalarga institutsional investorlarning talabini shakllantirish masalalari muhokama qilindi.
Panel sessiyasida sohaning nufuzli ma’ruzachilari, jumladan, O‘zbekiston Respublikasi Markaziy banki raisi o‘rinbosari Sanjar Nosirov, "AD Wealth" boshqaruvchi sherigi Alisher Jumanov, "IMAN" bosh ijrochi direktori Rustam Raxmatov, Ruminiyaning sobiq tashqi ishlar vaziri Ramona Menesku hamda O‘zbekiston iqtisodiy rivojlanish jamg‘armasi vitse-prezidenti Salome Svanadze o‘z ma’ruzalari bilan ishtirok etishdi.
Ekspertlarning firicha, O‘zbekistonda islomiy moliya ekotizimining rivojlanishi Ko‘rfaz mamlakatlaridan yirik investitsiya oqimlarini jalb qilish va mamlakatda tadbirkorlik sohasini moliyalashtirishning muqobil manbalarini yaratishda yangi ufqlarni ochib beradi.
Forum doirasidagi muhokamalar va sho‘ba majlislari davom etmoqda.
O‘zbekiston musulmonlari idorasi
Matbuot xizmati
