Mamlakatimiz ommaviy axborot vositalari safiga yana bir yangi nashr qo‘shildi: «Hilol-nashr» nashriyot-matbaa majmuasi muassisligida «Hilol» ilmiy-ma’rifiy, ijtimoiy-adabiy jurnali nashr etila boshlandi. Jurnalni nashr etish g‘oyasi atoqli olim, fazilatli shayx Muhammad Sodiq Muhammad Yusuf rahimahullohga tegishli bo‘lib, u kishi boshlagan katta ilmiy-ma’rifiy ishlarning uzviy davomi sanaladi. «Sof Islom ma’rifatini keng yoyish» shiori ostida o‘z faoliyatini boshlagan jurnalga dinimiz ta’limotlarini yorituvchi zarur ma’lumotlar, ma’rifiy suhbatlar, amri ma’ruf va nahyi munkar qilish asosida katta islohotlar qarshisida turgan xalqimizga sof Islom ta’limotlarini tushuntirish, musulmonlar ma’rifatini oshirishga hissa qo‘shish vazifasi yuklangan.

Jurnalning ilk sonida «Tafsir», «Fiqh», «Sahobalar hayoti», «Dunyo olimlari e’tirofi», «Nasihat», «Farzand tarbiyasi», «Ayollar sahifasi», «Adabiyot», «Mashhur masjidlar» kabi o‘nlab ruknlar ostida Islom dini ta’limoti va musulmonlar hayotiga oid ko‘plab qiziqarli materiallar e’lon qilingan. Ayniqsa, mashhur arab olimi shayx Muhammad Avvomaning «Bu yurtning ilmga sadoqatiga guvohmiz!» nomli maqolasi, Naqshbandiya tariqatining yirik namoyandalaridan biri Zulfiqor Ahmad Naqshbandiy hazratlarining ayollarga er bilan munosabatlarni yaxshilash borasida qilgan nasihatlari, farzandlar qalbida Alloh taologa muhabbat uyg‘otish yo‘llari haqidagi maqolalar o‘quvchilarda katta qiziqish uyg‘otishi mumkin.

Har bir nashr o‘z o‘quvchilarining muhabbatini qozonish, ularning qalbiga yetib borish va o‘zaro muloqotni kuchaytirish orqaligina e’tibor topadi, ommalashadi. Shu bois tahririyat o‘quvchilarga murojaat qilib, jurnal bilan muntazam hamkorlik qilish, qimmatli tavsiya-maslahatlari, fikr-mulohazalari bilan jurnal faoliyatida ishtirok etishga chorlaydi.

Yangi jurnal mamlakatimizning barcha musulmonlariga muborak bo‘lsin, uning qadami qutlug‘ kelsin! Ko‘p yillar davomida xalqimizga buyuk Allohni tanitish, umumbashariyat uchun foydali bo‘lgan dinimizning barcha nodir, ezgu fazilatlarini bayon etish, odamlarimiz iymon-e’tiqodini yanada mustahkamlash, ularga din arkonlarini o‘rgatishda eng yaxshi hamkor va yo‘ldosh bo‘lishini Allohning O‘zi muvaffaq aylasin!

Islom.uz portali tahririyati