Muftiy hazrat Tatariston musulmonlari diniy boshqarmasiga tashrif buyurdi
Kuni kecha, 13 mart kuni O‘zbekiston musulmonlari idorasi raisi, muftiy Usmonxon Alimov hazratlari Tataristondagi xizmat safarlari davomida Tatariston musulmonlari idorasi, madrasalari va masjidlari faoliyati bilan yaqindan tanishdilar. Tatariston musulmonlari diniy boshqarmasi raisi, muftiy Kamil hazrat Samigullin va boshqa mutasaddilar bilan o‘zaro muloqotlar o‘tkazdilar. Muftiy hazratlari Diniy boshqarma ish faoliyati, madrasalarda dars berish jarayonlari, kutubxonalar fondi, mudarrislarning saboq berish mahorati va talabalarga yaratilgan shart-sharoitlarni birma-bir ko‘zdan kechirdilar.
Ma’lumot o‘rnida, Tatariston musulmonlari diniy boshqarmasi 1992 yilda Tatariston musulmonlari qurultoyi qarori bilan tashkil etilgan. Gabdulla hazrat Galiullin Tatariston musulmonlari diniy boshqarmasining birinchi raisi etib saylangan. 1998 yilda Tatariston musulmonlari diniy boshqarmasi Adliya vazirligida davlat ro‘yxatidan o‘tkazilgan. 2013 yil aprel oyidan boshlab, muftiy Kamil hazrat Samigullin Tatariston musulmonlari diniy boshqarmasini boshqarib kelmoqda.
Tatariston musulmonlari diniy boshqarmasi bugungi kunda o‘z tarkibiga 9 ta qoziyot, 48 ta tuman muhtasiblari, 1415 ta masjid, 9 ta madrasani o‘z ichiga oladi.
Shuningdek, diniy boshqarma Qozon islom universiteti muassisi hamda Rossiya islom instituti va Bulg‘or islom akademiyasi hammuassisi hisoblanadi.
Tatariston musulmonlari diniy boshqarmasi uslubiy rahbarligi ostida "Halol" standart qo‘mitasi, Tatariston “Vaqf” jamg‘armasi, Tatariston musulmonlari diniy boshqarmasi Haj rasmiy haj-operatori, “Zakot” xayriya jamg‘armasi, “Huzur” nashriyot uyi o‘z faoliyatlarini olib bormoqda.
Tomonlar uchrashuvlar davomida o‘zaro tajriba almashib, bir-birlariga esdalik sovg‘alari topshirdilar.
Safar jarayonlarini saytimiz orqali kuzatishda davom eting.
O‘zbekiston musulmonlari idorasi Matbuot xizmati
Shavkat Mirziyoyev: Yoshlarimizning har bir muvaffaqiyati biz uchun kuch-qudrat
Bugun mamlakatimizda Yoshlar kuni keng nishonlanmoqda. Asosiy bayram tadbirlari Toshkentdagi Xalqaro kongress markazida bo‘lib o‘tmoqda.
O‘zbekiston yoshlarini tabriklash va qo‘llab-quvvatlash uchun bu yerga Prezident Shavkat Mirziyoyev tashrif buyurdi.
Kongress markaziga kiraverishda yoshlarning turli sohalardagi loyihalari, kashfiyot va yutuqlari taqdimot qilindi. Masalan, “Yosh innovatorlar” ko‘rgazmasida muhandislik, raqamli texnologiyalar, sun’iy intellekt, uchuvchisiz qurilmalar namoyish etilgan. “Yashil” tashabbuslar” maydonchasida ekologiya, muqobil energetika, qishloq xo‘jaligi kabi sohalarga oid ishlanmalar ko‘rsatilgan. “Kreativ loyihalar” bo‘limidan hunarmandlik, dizayn, tasviriy san’at, video va prodyuserlik faoliyatidagi yutuqlar o‘rin olgan. “Yoshlar tadbirkorligi va startaplar” maydonchasida ushbu yo‘nalishdagi muvaffaqiyatli loyihalar haqida ma’lumot berilgan.
Jumladan, toshkentlik Rustam Hamdamovning “Billz” dasturi kichik va o‘rta biznesni avtomatlashtirishga yordam beradi. Hozirgacha bu loyihaga Buyuk Britaniya, Singapur, Turkiya ishbilarmonlari 6 million 600 ming AQSH dollari miqdorida investitsiya kiritgan.
Qoraqalpog‘istonlik yosh fermer Sherzod Niyazimbetov organik pomidorlar yetishtirib, quyoshda quritib va qadoqlab, Italiya hamda Fransiya kabi davlatlarga eksport qilmoqda. Uning korxonasida 200 nafarga yaqin xodim ishlamoqda.
O‘zbekiston Prezidentining 2019 yildagi qarori bilan tashkil etilgan Yoshlar akademiyasi bugungi kunda 7 mingdan ziyod yosh olimlarni birlashtirgan. Ko‘rgazmada ular uchun keng o‘rin ajratilgan. Toshkentlik Sayfullo Qodirov ekin maydonlarini raqamli xaritalash va yuqoridan dori sepish imkonini beruvchi dronlar yasagan.
Olimlar orasida “Raqamli avlod qizlari” tanlovi g‘olibalari ko‘pligi ham diqqatga sazovor. Xorazmlik Lobar Abdullayeva onkologik kasalliklarga sun’iy intellekt orqali tashxis qo‘yishga mo‘ljallangan “AI Scan” dasturini ishlab chiqqan. Qoraqalpog‘istonlik Qumara Sagidullayeva quyosh energiyasida yuruvchi kichik traktor, toshkentlik Abdulloh Jamoliddinov bog‘ni avtomatik sug‘orish tizimini ixtiro qilgan.
Davlatimiz rahbari mazkur taqdimotlar bilan tanishib, ularning tashabbuskorlari bilan muloqot qildi.
– Yoshlarimizning har bir muvaffaqiyati biz uchun kuch-qudrat, mamlakatimiz kelajagiga tayanch. Bugun farzandlarimiz zamonaviy yo‘nalishlarni egallab, ancha ilgarilab ketyapti. Ularni qo‘llab-quvvatlasak, sifatli ta’lim berib, sharoit yaratsak, bundan ham katta natijalarga erishadi, – dedi Shavkat Mirziyoyev.
Mutasaddilarga ixtirochi yoshlarni tegishli vazirliklarga biriktirib, loyihalarini rivojlantirish bo‘yicha ko‘rsatma berildi.
Yurtimizda bunday iqtidorli o‘g‘il-qizlar ko‘p. Bu ta’lim sohasiga, ayniqsa, STEAM yo‘nalishlariga qaratilayotgan e’tibor natijasi. So‘nggi yillarda matematika, fizika, kimyo va axborot texnologiyalariga ixtisoslashgan ko‘plab maktablar tashkil etildi. “Bir million dasturchi” loyihasi doirasida 325 ming yigit-qiz o‘qitildi.
Yosh tadbirkorlar tashkil qilgan 261 ta korxonaning yillik aylanmasi 100 milliard so‘mdan oshgan. Startaplarni moliyalashtirishga 145 million dollar venchur sarmoya kiritilgan.
Bayram munosabati bilan o‘tgan uchrashuvda Prezidentimiz yoshlar uchun yanada keng imkoniyatlarni belgilab berdi.
Manba: https://president.uz
