Londonda “Qur'on o'simliklari” ko'rgazmasi ochildi
Londonda dunyodagi eng katta va eng mashhur xalqaro “Kew Gardens” bog'ida Qur'oni karimda zikri kelgan o'simliklar haqida ma'lumot beruvchi maxsus ko'rgazma tashkil etildi. Bu Qur'oni karim mazmunini tanishtirishni maqsad qilgan ilk tashabbuslardan sanaladi.
Buyuk Britaniya poytaxti London g'arbida joylashgan ushbu bog'da tashkil qilingan ko'rgazmada Qur'oni karimda zikr etilgan o'simliklarning chizmasi, fotosuratlari ham namoyish etildi. Ko'rgazma faoliyati shu yilning 17 sentabrigacha tomoshabinlar uchun ochiq ekani ma'lum qilindi.
O'z navbatida bog' ma'muriyati: “Qur'oni karimda ko'plab misol va ta'limotlar mavjud, shuningdek, unda tabiat manzarasi, xususan, yashil maydon, o'simlik va gullar haqida so'z yuritilgan”, deydi.
Ko'rgazmada namoyish etilgan san'at asarlari to'plamini “Qur'on o'simliklari: tarix va madaniyat” kitobi muallifi doktor Shahina G'azanfar va Yangi Zelandiyada yashovchi botanika bo'yicha illyustrator Suye Vikison yaratdi.
Vikison tomonidan ishlangan 30 ta fotosuratdan iborat Qur'on o'simliklari ko'rgazmasida sarimsoq va anordan tortib uzum va xinagacha bo'lgan keng turdagi o'simliklar va ularning Qur'ondagi ahamiyati va mazmuni haqida ma'lumotlar taqdim etilgan.
Shunisi e'tiborga loyiqki, “Kew Gardens” bu sohada dunyodagi eng yirik xalqaro bog' hisoblanadi. Chunki u dunyodagi eng katta va eng xilma-xil o'simlik va qo'ziqorin kollektsiyalarini o'z ichiga oladi.
Halqaro bog'lar Londonning g'arbiy qismida joylashgan bo'lib, ularda 1 100 dan ortiq xodim ishlaydi va yillik byudjeti 65 million funt sterling, ya'ni 85 million AQSh dollaridan oshadi.
O'zbekiston musulmonlari idorasi
Matbuot xizmati
"Imom Buxoriy" ordeni — yuksak ehtirom ramzi!
Kuni kecha mamlakatimiz mustaqilligining 35 yilligi munosabati bilan muhtaram Prezidentimiz tomonidan yuksak davlat mukofotlariga sazovor bo‘lgan bir guruh vatandoshlarimiz taqdirlandi.
Eng quvonchlisi shuki, tadbirda diniy-ma’rifiy sohada fidokorona xizmat qilib kelayotgan, xalqimizning ma’naviy yuksalishiga beqiyos hissa qo‘shayotgan taniqli ulamolarimiz va faxriylarimizning zahmatli mehnatlari yuksak darajada e’tirof etildi!
Xususan, Diniy idora tizimida uzoq yillardan beri samarali xizmat qilib kelayotgan ustozlardan O‘zbekiston musulmonlari idorasi raisining birinchi o‘rinbosari Homidjon domla Ishmatbekov, O‘zbekiston musulmonlari idorasi Faxriylar kengashi raisi Shayx Abdulaziz Mansur, Samarqand viloyati Payariq tumani "Imom al-Buxoriy" jome masjidi faxriy imomi Mahmudjon domla Ibodullayev, Buxoro viloyati Kogon tumani "Bahouddin Naqshband" jome masjidi imom-xatibi Abdug‘ofur domla Razzoqov "Imom Buxoriy" ordenini Davlatimiz Rahbaridan qabul qilib olishdi.
Ustozlarning ilmiy-ma’rifiy faoliyati, xalq ichida ma’rifat ulashishdagi fidoyiliklari davlatimiz tomonidan yuksak qadrlangani butun diniy-ma’rifiy sohada mehnat qilayotganlar uchun katta faxr va sharafdir.
Ushbu voqea Yangi O‘zbekistonda diniy-ma’rifiy sohaga, milliy qadriyatlarimizni avaylab-asrash hamda rivojlantirishga qaratilayotgan izchil va xayrli siyosatning amaliy ifodasidir.
Xalqimizda qadimdan ma’rifat ahlini ulug‘lash, ularning zahmatli mehnatini qadrlash ezgu an’ana sanaladi. Islom ta’limotida ham ilm egalariga alohida maqom va hurmat bilan qaraladi. Zero, Imom Termiziy bobomiz rivoyat qilgan hadisi sharifda: «Ulamolar payg‘ambarlarning merosxo‘rlaridir», deyilgan.
Ulamolarga ko‘rsatilayotgan bunday e’tiborning nechog‘li xayrli ekani quyidagi hikmatda ham o‘z ifodasini topgan. Ulug‘ zotlardan biri Tovus rahmatullohi alayh otasidan quyidagicha rivoyat qilgan: «To‘rt kishini hurmat qilish sunnatdir: olim, yoshi ulug‘ inson, podshoh va ota» (Imom Abdurazzoq rivoyati).
Mazkur yuksak mukofot milliy va diniy qadriyatlarimizni tiklash, Islom ma’rifatini keng targ‘ib etish, jamiyatda bag‘rikenglik va tinchlik-omonlikni bardavom saqlash yo‘lidagi ko‘p yillik xayrli xizmatlarning munosib e’tirofidir.
Davlatimizning bunday e’tibori diniy soha xodimlariga yanada ulkan mas’uliyat yuklaydi, ma’naviy yuksalish yo‘lidagi xayrli xizmatlar ko‘lamini yanada kengaytirishga xizmat qiladi, insha Alloh.
O‘zbekiston musulmonlari idorasi Matbuot xizmati
- «
- »