Malayziya Islom universiteti O‘zbekiston OTMlari bilan hamkorlik qiladi
Tashqi ishlar vazirligi xabar berishicha 2019 yilning 4 mart kuni Malayziya Islom ilmiy universiteti (USIM) rahbariyati va professor-o‘qituvchilari bilan O‘zbekiston delegatsiyasi o‘rtasida uchrashuv bo‘lib o‘tgan.
Ushbu ta’lim muassasasiga 1998 yilda asos solingan bo‘lib, Malayziya Islom ilmiy universitetida 32 yo‘nalishda ta’lim beriladi. Bugungi kunda bu dargohda 15 ming talaba tahsil oladi.
Uchrashuv chog‘ida USIM va mamlakatimiz ta’lim muassasalari o‘rtasidagi munosabatlarni rivojlantirish istiqbollari muhokama qilindi hamda bu kabi hamkorlikning samaradorligi alohida ta’kidlandi. So‘nggi yarim yil ichida USIM bilan Urganch davlat universiteti va Samarqand davlat arxitektura-qurilish instituti o‘rtasida tadqiqotlarni birgalikda o‘tkazish sohasida, mutaxassislarni tayyorlash va ularning malakasini oshirish, talabalarni almashish bo‘yicha hamkorlik to‘g‘risidagi sherikchilik bitimlari imzolandi. Shuningdek, Malayziya universiteti O‘zbekiston milliy universiteti va Buxoro davlat universiteti bilan ham hamkorlik aloqalarini o‘rnatgan.
Natijada joriy yilning yanvar oyidan O‘zbekiston Xalqaro islom akademiyasi va Urganch davlat universitetida Islom ilmiy universiteti yetakchi professorlarining Islom huquqi va banking, turizm, menejment, AKT va boshqa yo‘nalishlar bo‘yicha leksiyalari tashkil etildi.
Oliy ta’lim muassasalari o‘rtasidagi hamkorlikni chuqurlashtirish va “visiting professors” shaklidagi amaliyotni davom ettirish maqsadida universitetning injeneriya va qurilish fakulteti dekanini Toshkent arxitektura-qurilish institutida mustahkam arxitektura mavzusida leksiyalar kursini o‘tkazishi uchun 2019 yil 27 martdan 11 aprelgacha O‘zbekistonga yuborish to‘g‘risida kelishuvga erishildi.
O‘zbekiston musulmonlar idorasi Matbuot xizmati
Muqaddas maskanga munosabat qanday bo‘lishi kerak?
Imom Buxoriy majmuasi nafaqat O‘zbekiston, balki butun islom olami uchun ulug‘ va muqaddas qadamjolardan biri hisoblanadi.
Hazrat Imom Buxoriydek buyuk muhaddis nomi bilan bog‘liq ushbu majmua bugun yurtimizning eng yirik ma’naviy va madaniy markazlaridan biriga aylangan. Har kuni minglab ziyoratchilar bu yerga kelib, ajdodlar merosi, ma’rifat va muqaddas tarix bilan yuzlashmoqda.
Majmua nafaqat ziyoratgoh, balki xalqimizning boy ma’naviy merosi, milliy me’morchiligi va islom sivilizatsiyasidagi o‘rnini namoyon etuvchi noyob madaniy ob’yektdir. Uni barpo etish uchun katta mehnat, yuksak mahorat va qimmatbaho qurilish materiallari sarf etilgan. Shu bois bu qutlug‘ maskanni asrab-avaylash har birimiz uchun muhim vazifadir.
Yaqinda Madaniy meros agentligi tomonidan ayrim ziyoratchilarning majmua hududida beparvo munosabatda bo‘layotgani haqida ma’lumot berildi. Ayrim holatlarda ustunlar, ayvonlar va muzey eksponatlariga ehtiyotsiz munosabatda bo‘lish, chiqindilarni duch kelgan joyga tashlash kabi holatlar kuzatilmoqda. Bu esa nafaqat ziyoratgoh ko‘rkiga, balki uning ma’naviy muhitiga ham salbiy ta’sir ko‘rsatadi.
Bu holat barchamizni sergaklikka chaqirishi kerak. Zero, muqaddas qadamjoga kelgan inson avvalo o‘zini munosib tutishi, tozalik va tartib-qoidalarga amal qilishi lozim. Chunki ziyoratgoh — oddiy sayrgoh emas. Bu yerda asrlar nafasi, buyuk ajdodlar ruhi va ma’rifat ziyosi mujassam.
Tozalik esa inson madaniyatining eng muhim ko‘rsatkichlaridan biri. Islom ta’limotida ham poklikka alohida ahamiyat berilgan. Payg‘ambarimiz Muhammad alayhissalom “Tozalik — iymonning yarmidir”, deya ta’kidlaganlar. Demak, ziyoratgoh hududida ozodalikni saqlash nafaqat fuqarolik burch, balki ma’naviy mas’uliyat hamdir.
Ayniqsa, chet ellik mehmonlar O‘zbekiston haqidagi ilk taassurotni aynan shunday muqaddas maskanlar orqali oladi. Agar ziyoratgoh ozoda, tartibli va fayzli bo‘lsa, bu xalqimizning yuksak madaniyati va ma’naviyatini namoyon etadi. Aksincha, beparvolik va tartibsizlik mamlakatimiz nufuziga salbiy ta’sir ko‘rsatishi mumkin.
Yosh avlodni ziyoratgoh madaniyati ruhida tarbiyalash ham muhim ahamiyatga ega. Bolalar kattalardan ibrat oladi. Agar ota-ona muqaddas joyda tartibga amal qilsa, ehtiyotkor bo‘lsa, farzand ham shu ruhda tarbiya topadi. Shu bois har bir inson o‘z harakati bilan boshqalarga namuna bo‘lishi kerak.
Imom Buxoriy majmuasi — millatimiz g‘ururi va ma’naviy boyligi. Uni asrash, tozaligini saqlash va ehtirom bilan munosabatda bo‘lish har bir insonning vijdoniy burchidir. Ziyoratgohlarga bo‘lgan munosabatimiz orqali biz o‘z madaniyatimiz, ma’naviyatimiz va ajdodlar merosiga bo‘lgan hurmatimizni namoyon etamiz.
Asliddin Mustafoyev, majmua axborot xizmati rahbari.
O‘zbekiston musulmonlari idorasi Matbuot xizmati
