Buyuk maqsadlar buyuk mas’uliyatni talab qiladi
Bugun, 16 fevral kuni O‘zbekiston musulmonlari idorasi tasarrufidagi Imom Buxoriy nomidagi Toshkent islom institutida O‘zbekistondagi Islom sivilizatsiyasi markazi rahbarining institut talabalari bilan uchrashuvi bo‘lib o‘tdi.
Toshkent Islom instituti talabalariga Islom sivilizatsiyasi markazi loyihasi taqdim qilindi. Xususan O‘zbekiston Respublikasi Prezidenti Shavkat Mirziyoyevning tashabbusi bilan barpo etilayotgan ushbu markaz oldiga qo‘yilgan maqsad va vazifalarning markaz binosi mahobatiga mos ekani, buyuk ajdodlardan qolgan boy ilmiy-ma’naviy merosni saqlash, o‘rganish va targ‘ib qilish kelajakda Islom dini tarixi, uning asl tinchlik, ezgulik, insoniylik va bunyodkorlik hamda yuksak axloqdan iborat mohiyatini jamiyat a’zolariga yetkazib bera olishga qodir bo‘lgan mutaxassislarni shakllantirishni taqozo qilishi talabalarga tushuntirib berildi.
Islom dini ilmlari, arab, fors, ingliz va rus tillarini puxta egallagan, milliy va diniy qadriyatlarimiz asosida shakllangan odoblilik, intiluvchanlik, vatanparvarlik kabi yuksak fazilatlarga ega yosh mutaxassislar kelajakda, albatta, Islom sivilizatsiyasi markazida faoliyat olib borishlari mumkinligi qayd etildi.
Uchrashuv samimiy, ochiq suhbat tarzida o‘tdi. Talabalar o‘zlarini qiziqtirgan savollarga javob oldilar hamda ustozlar bilan fikr almashdilar.
Islom sivilizatsiyasi markazi Matbuot xizmati
"Islom giyohvandlikka qarshi" mavzusida seminar o‘tkazildi
#Seminar
#Giyohvandlikka_qarshimiz
Islom dinida aqlni xiralashtiradigan, sog‘liqqa zarar yetkazadigan va insonni o‘z-o‘zini halokatga boshlaydigan har qanday zararli odatlar, xususan, giyohvandlik qat’iy qoralangan va harom qilingan.
Payg‘ambarimiz Muhammad sollallohu alayhi va sallam har qanday mast qiluvchi va badanni bo‘shashtiruvchi, sog‘liqqa zarar beruvchi moddalarni iste’mol qilishdan qaytarganlar.
Binobarin, giyohvandlikka qarshi kurashish, yoshlarni bu ofatdan asrash va sog‘lom turmush tarzini targ‘ib qilish har bir musulmonning burchidir.
2026 yil 2 iyul kuni Toshkent shahridagi muhtasham "Shayx Muhammad Sodiq Muhammad Yusuf" jome masjidining majlislar zalida o‘zgacha bir fayz va ilmu ma’rifat shukuhi hukmron bo‘ldi.
O‘zbekiston musulmonlari idorasi Toshkent shahar vakilligining "Islom giyohvandlikka qarshi" deb nomlangan ilmiy-amaliy seminari yuqori kayfiyatda va ko‘tarinki ruhda o‘tkazildi.
Uchrashuvda diniy-ma’rifiy sohaning zabardast vakillari, davlat va jamoat tashkilotlari mutasaddilari hamda poytaxtimizning tuman bosh imom-xatiblari va otinoyilari jam bo‘lishdi.
Qur’on tilovatidan so‘ng Toshkent shahar bosh imom-xatibi, yig‘ilish raisi Abduqahhor domla Yunusov tadbirni ochib berdilar.
So‘ngra Din ishlari bo‘yicha qo‘mita bo‘lim boshlig‘i Muhiddin Hakimov, Toshkent shahar hokimining jamoat va diniy tashkilotlar bilan aloqalar bo‘yicha o‘rinbosari, kotibiyat mudiri Abdumannon Karimov, Ko‘kaldosh o‘rta maxsus islom bilim yurti rahbari Ma’murjon domla Erkayevlar ishtirok etib, kun tartibidagi muhim masalalar yuzasidan o‘z fikr-mulohazalari va qimmatli tavsiyalarini aytib o‘tdilar.
Aytish joizki, ma’rifat va iymon birlashgan joyda baraka, tinchlik va taraqqiyot bo‘ladi. Poytaxtimiz imom-xatiblari bugun xalqimizga mana shu ziyoni yetkazishda eng oldingi saflarda xizmat qilmoqdalar.
Suratlar orqali mazkur yig‘ilishning eng hayajonli va fayzli daqiqalari hamda seminarning dolzarb ahamiyatini ko‘rish mumkin.
MuslimShosh.uz
