Avvalroq xabar qilganimizdek, 2019 yilning 17 yanvar kuni Toshkent viloyatining Chirchiq shahrida 300 dan ziyod eshitish va gapirish qobiliyati cheklanganlar bilan diniy-ma’rifiy tadbir o‘tkazilgan edi. Ushbu tadbir O‘zbekiston Respublikasi Prezidentining 2017 yil 1 avgustdagi “Nogironligi bo‘lgan shaxslarni davlat tomonidan qo‘llab-quvvatlash tizimini tubdan takomillashtirish chora-tadbirlari to‘g‘risida”gi Farmonining ijrosini ta’minlash maqsadida tashkil etilgandi.
Ana shu xayrli tadbir so‘ngida viloyatimizning tuman va shaharlarida manzilli tarzda shunday suhbat kechalarini tashkil etishga kelishib olingan edi. Rejaga muvofiq tadbirlarning dastlabkisi Chirchiq shahri, Qibray va Bo‘stonliq tumanlari uchun Chirchiq shahridagi “Markaziy” jome masjidida joriy yilning 24 yanvar kuni o‘tkazilgandi.
Bugun – 2019 yilning 7 fevral kuni – boshlangan ezgu ishning davomi o‘laroq manzilli diniy-ma’rifiy tadbir Angren, Ohangaron va Olmaliq shahri, Ohangaron, Piskent tumanlari uchun Olmaliq shahridagi “Ramazoni sharif” jome masjidida bo‘lib o‘tdi.
Unda Toshkent viloyati bosh imom-xatibi Xayrulloh domla Turmatov, Toshkent viloyati hokimi o‘rinbosari, xotin-qizlar qo‘mitasi raisi Ozoda Parpiyeva, Olmaliq shahar hokimi o‘rinbosari, xotin-qizlar qo‘mitasi raisi K.Umaraliyeva, “Oila” ilmiy-amaliy markazi rahbari B.Tangirovalar ishtirok etdi.
Tadbirni viloyat bosh imom-xatibi Xayrulloh domla Turmatov kirish so‘zi bilan ochib berdilar va yig‘ilganlarga Islom, uning arkonlari, qirq farz, ota-onaga yaxshilik qilish, qo‘shnichilik munosabatlari haqida to‘xtalib o‘tdilar.
Shundan so‘ng, masjidga tashrif buyurgan eshitish va gapirish qobiliyati cheklanganlarning muammolari tinglandi, fikr-mulohazalari o‘rganildi. Aniqlangan ma’lumotlarga ko‘ra, viloyat hokimligi va mutasaddi tashkilotlar bilan hamkorlikda ularning mehnat qilish, uy-joy, sog‘liqni saqlash bilan bog‘liq masalalarini yechishga yordam ko‘rsatiladigan bo‘ldi. Shuni alohida ta’kidlash joizki, Navro‘z umumxalq bayrami arafasida 3 nafar kam ta’minlangan, eshitish va gapirish qobiliyati cheklanganlarning nikoh to‘yini o‘tkazib berishga kelishib olindi.
Tadbir so‘ngida homiylar tomonidan tashrif buyurgan 80 nafar eshitish va gapirish qobiliyati cheklanganlarga 4 million so‘mlik oziq-ovqat mahsulotlari taqdim etildi.
Diniy-ma’rifiy tadbir xayrli duolar, ezgu istaklar, ishtirokchilarning qalbidagi quvonch va yuzlaridagi tabassum bilan yakunlandi.
Manba: http://fitrat.uz
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 
