Abu Bakr Siddiq roziyallohu anhu Nabiy sollallohu alayhi vasallamdan farz namozlardan keyin doim aytib yurishlari uchun biror duo o‘rgatishlarini so‘raganlarida, Nabiy sollallohu alayhi vasallam:

“Allohumma inniy zolamtu nafsiy zulman kasiyron va laa yag‘firuz zunuuba illa anta. Fag‘firliy mag‘firotan min indika varhamniy. Innaka antal G‘ofurur Rohiym” degan duoni o‘rgatgan ekanlar.

Duoning ma’nosi: “Ey Alloh! Albatta, men o‘z nafsimga ko‘p zulm qildim. Gunohlarni faqatgina Sen mag‘firat qilasan. Bas, huzuringdan bo‘lgan mag‘firat ila meni mag‘firat etgin va menga rahm qilgin! Albatta, Sen G‘ofur, Rohiym Zotsan”.

Payg‘ambarlar alayhimussalomdan keyin insonlarning afzali bo‘lgan Abu Bakr Siddiq roziyallohu anhuga ushbu duo o‘rgatilibdimi, demak, bizlar ko‘zimizni kattaroq ochishimiz, tilimizdan ham, dilimzdan ham istig‘forni qo‘ymasligimiz kerak. Alloh taolo bizni ixlos bilan ko‘p istig‘for aytib, O‘zining mag‘firatiga erishadigan bandalaridan qilsin, omin!

Nozimjon Iminjonov tayyorladi