Misrdagi o‘zbekistonlik talabalar bilan uchrashuv
Kuni kecha, Misrda xizmat safarida bo‘lib turgan O‘zbekiston musulmonlari idorasi raisi, muftiy Usmonxon Alimov hazratlari Misr oliygohlarida ta’lim olayotgan talabalar va u yerda mehnat qilayotgan vatandoshlar bilan muloqot qildi. Ushbu tadbir O‘zbekistonning Misrdagi elchixonasi tashabbusi bilan “Xilton” mehmonxonasida tashkil etildi.
Uchrashuvda muftiy Usmonxon Alimov hazratlari O‘zbekistonda olib borilayotgan islohotlar, ularning mazmun-mohiyati va kelgusidagi rejalar xususida yig‘ilganlarga so‘zlab berdilar. Shuningdek, har bir talaba va vatandoshimizning murojaatiga quloq tutib, ularning hol-ahvoli so‘raldi va kelgusidagi ishlariga muvaffaqiyatlar tilandi.
Misrdagi o‘zbekistonlik talabalar va vatandoshlar mana shunday yuksak e’tibor hamda amalga oshirilayotgan xayrli islohotlardan cheksiz mamnun bo‘ldilar. Hukumatimiz rahbariyati, ona-Vatanimiz va xalqimizga ezgu tilaklarni izhor qildilar.
O‘zbekiston musulmonlari idorasi Matbuot xizmati
Virtual tahdid: kiberjinoyatchilardan ogoh bo‘ling!
Bugun, 3 avgust kuni O‘zbekiston musulmonlari idorasida “Kiberjinoyatchilik: zamonaviy jamiyatning yangi tahdidi” mavzusida onlayn yig‘ilish o‘tkazildi.
Unda Diniy idora Huquqshunoslik bo‘limi boshlig‘i Jahongir Hotamov so‘zlab, ishtirokchilar e’tiborini bugungi kunda dolzarb muammoga aylanib borayotgan kiberjinoyatlar ko‘lamiga qaratdi.
Rasmiy ma’lumotlarga ko‘ra, o‘tgan yili Toshkentda kiberjinoyatlar soni 16 mingdan ortgan. Fuqarolar qariyb 2 trillion so‘m moddiy zarar ko‘rgan bo‘lsa-da, ularni fosh etish 8 foizga ham yetmagan.
Ushbu jinoyatlarga keskin barham berish va oldini olish uchun 2026 yil 10 mart kuni “O‘zbekiston Respublikasining Kiberxavfsizlik strategiyasini belgilash va kiberjinoyatchilikning oldini olish tizimini takomillashtirish to‘g‘risida” Prezident Farmoni qabul qilindi. Farmon asosida O‘zbekiston Respublikasining 2026 – 2030 yillarga mo‘ljallangan kiberxavfsizlik strategiyasi qabul qilindi.
Yuqoridagi kabi salbiy xolatlarning oldini olishda aholining huquqiy savodxonligini oshirish muhim hisoblanadi. Shu maqsadda Diniy idora bosh yuristi Alisher Agzamov Kiberjinoyatchilikning paydo bo‘lish tarixi, asosiy turlari, kiberjinoyatga duch kelgan kishi nima qilishi kerakligi, kiberxavfsizlikning oddiy qoidalari haqida tushunchalar berib o‘tdi.
O‘zbekiston musulmonlari idorasi
Matbuot xizmati
