Dubay shahridagi O'zbekiston Bosh konsulxonasida Amirliklarda faoliyat yurituvchi “SYSTEM HOLIDAYS” LLC sayyohlik shirkati mudiri Ravshan Zakirov bilan uchrashuv bo'lib o'tdi, deb xabar bermoqda “Dunyo” AA muxbiri.

Uchrashuvdan ko'zlangan asosiy maqsad O'zbekistonda turizm sohasida olib borilayotgan keng ko'lamli islohotlarni targ'ib etish, Toshkent, Samarqand, Buxoro va Hiva kabi ko'hna shaharlarda sayohatchilar uchun yaratilgan shart-sharoitlar, respublikamizning boy madaniy va ma'naviy merosi to'g'risida ma'lumotlar berish, o'zbek xalqining tarixi, madaniyati, urf-odatlari va an'analarini keng targ'ib etish, ommalashtirish va mamlakatimizga xorijlik sayyohlar oqimini ko'paytirish bilan izohlanadi.

Uchrashuv davomida xorijiy sayyohlarga yanada ko'proq  qulaylik yaratish maqsadida davlatimiz rahbari tashabbussi bilan Samarqand viloyatida yiliga 2 million sayyohga xizmat ko'rsatuvchi ko'p tarmoqli «Buyuk ipak yo'li» xalqaro turizm markazi barpo etilgani va uning tarkibidagi «Boqiy shahar» majmuasi, Kongress xoll, 8 ta zamonaviy besh yulduzli mehmonxona, amfiteatr va ko'plab boshqa ob'ektlarga e'tibor qaratildi. Samarqand xalqaro aeroportining qayta ta'mirlanishi va «Ochiq osmon» rejimi yo'lga qo'yilishi natijasida xorijiy davlatlardan sayyohlar oqimini oshirishga imkoniyat yaratilgani aytib o'tildi.

Shu bilan birga, “SYSTEM HOLIDAYS” LLC sayyohlik shirkati mudiri bilan O'zbekistonga sayyohlar oqimini yanada ko'paytirish va ularning talablaridan kelib chiqib, yangi turizm xizmatlarini o'z ichiga olgan maxsus turpaketlar ishlab chiqish bo'yicha fikr almashildi.

Muzokaralar yakunida “SYSTEM HOLIDAYS” sayyohlik shirkati bilan O'zbekistonning tarixiy shaharlariga sayyohlarni jalb etish bo'yicha hamkorlik qilishga kelishib olindi.

O'zbekiston musulmonlari idorasi
Matbuot xizmati