O‘zbekiston musulmonlari idorasining tashabbusi bilan “Eng ma’rifatli imom” tanlovini yuqori saviyada o‘tkazish belgilanib, mazkur tanlovni yuqori saviyada tashkil etish bo‘yicha katta tayyorgarlik ishlari ko‘rildi. Tanlovda o‘z hududida ma’naviy-ma’rifiy ishlarda faollik ko‘rsatgan, yuqori kasbiy mahoratga ega, xalq orasida yuksak obruga ega bo‘lgan, tashabbuskor, innovatsion g‘oyalar yaratuvchisi, zamonaviy axborot texnologiyalaridan yetarlicha foydalana oladigan eng iqtidorli imom-xatiblarni aniqlashdan iborat.
Uch bosqichda o‘tkazilishi belgilangan tanlovning birinchi shahar va tumanlararo bosqichi joriy yil 5,6 oktyabr kunlari Nukus shahri, Ellikqala va Amudaryo tumanlarida o‘tkazildi.
O‘zbekiston musulmonlari idorasi mas’ul xodimi Muhammadayyub Homidov O‘zbekiston musulmonlari idorasi raisi, muftiy Usmonxon Alimov hazratlarining qoraqalpog‘istonlik ulamolar va diniy soha xodimlariga yo‘llagan salomini yetkazdi. So‘ng Qoraqalpog‘iston musulmonlari qoziyoti qozisi Shamsutdin Bauatdinov so‘zga chiqib, bunday diniy-ma’rifiy tanlovlarni o‘tkazishda tashabbuskorlik ko‘rsatgan Diniy idora Rahbariyatiga minnatdorchilik bildirdi va ishtirokchilarga omadlar tiladi.
Tanlovda turli nominatsiyalarda imomlardan tashqari masjidlarda fidokorona xizmat qilib kelayotgan xodimlar ham Qoraqalpog‘iston musulmonlari qoziyoti tarafidan «Faxriy yorliq» va esdalik sovg‘alar bilan munosib taqdirlandi.
“Eng ma’rifatli imom” tanlovining Qoraqalpog‘iston Respublikasi bosqichi g‘oliblari:
I o‘rin: Matsapayev Abduraxman (Amudaryo tumani “Yusuf eshon bobo” jome masjidi imom-xatibi);
II o‘rin: Abudjanov Toirjon (Turtkul tumani “Turtkul” jome masjidi imom-xatibi);
III o‘rin: Jumamuratov Yaqub (Taxiyatosh tumani “Muhammad Murod eshon” jome masjidi imom-xatibi).
“Eng namunali imom-noibi”
- Jolaushiyev Aybek (Nukus shahri Imom eshon Muhammad jome masjidi imom-noibi),
“Eng ko‘p obuna uyushtirgan imom”
- Idrisov Azat (Qorauzyak tumani “Idris eshon” jome masjidi imom-xatibi),
“Eng targ‘ibotchi imom”
- Seytjanov Bekmurza (Chimboy tumani “Xan” jome masjidi imom-xatibi),
“Eng xushovoz muazzin”
- Allambergenov Ilhom (Nukus shahri “Imom eshon Muhammad” jome masjidi muazzini),
“Eng ishbilarmon mutavalli”
- Abdijamilov Baxram (Nukus shahri “Imom eshon Muhammad” jome masjidi mutavallisi)
“Eng mirishkor bog‘bon”
- Najimov Raxmanberdi (Kegayli tumani “Eshon qal’a” jome masjidi bog‘boni),
“Eng namunali masjid”
- Taxiyatosh tumani “Sariq eshon” jome masjidi (masjid imom-xatibi Umirzaqov Rafatdin)
“Eng namunali tahoratxona”
- Turtkul tumani “Yonboshqal’a” jome masjidi tahoratxonasi (masjid imom-xatibi Qlichev Dosnazar)
Islamatdin Allanov
Qoraqalpog‘iston musulmonlari qoziyoti xodimi.
Har yangi kunning tongini ko‘rganingizda qalbingizni zikr ila to‘ldiring. Iymon zikrlariga quloq tutar ekansiz, borliq Yaratgan Zot sari talpinayotganini his qilasiz. Alloh taolo aytadi: «...Mavjud bo‘lgan barcha narsa hamd bilan Unga tasbeh aytur...»[1]. Balki uyda, balki ko‘chada, qayerda bo‘lsangiz-da, Allohning zikriga shoshiling. Zikrlarni ko‘paytirganingiz sari Allohga bo‘lgan muhabbatingiz ortib boradi, osmonlaru yerning Xoliqi bo‘lgan Alloh taolodek buyuk Zot suyanchig‘ingiz ekanini anglaysiz...
Ushbu misralarni doim yodda tuting:
Gar ersa qalblar Xoliqin zikridin mosuvo,
Alar jasad ichidin joy olgan tosh kabi go‘yo.
Qalbingizni zabonsiz toshga aylantirib qo‘ymang.
Toshda na mehr va na his bor. Payg‘ambarimiz sollallohu alayhi vasallam: “Robbini zikr qiladigan bilan zikrdan yiroqda bo‘lgan kishi xuddi tirik bilan o‘lik kabidir” [2], deganlar.
Yana Nabiy alayhissalom: “Sizlarga amallaringizning eng xayrlisi va Sultoningiz huzurida eng pokiza, darajangizni yuqorilatadigan, sizlar uchun tillo-kumushlarni ehson qilgandan-da, dushmaningizga yo‘liqib, uning boshini tanasidan judo qilishingiz, u ham sizning kallangizni bo‘yningizdan uzib tashlashidan-da yaxshiroq amal qaysi ekanini bildirib qo‘yaymi?!” – dedilar. Sahobalar: ”Ha, ey Allohning Rasuli”, deyishdi. U zot: U Allohning zikridir”,3] dedilar.
Ubayd ibn Umayr aytadilar: “Mo‘minning amal daftaridagi hamd ila tasbeh – u bilan dunyo tog‘laricha tillo sudralib yurishidan xayrlidir”.
Nabiy alayhissalom yana boshqa bir hadisda: «Alloh taoloning fazilat izlab kezib yuruvchi farishtalari bo‘lib, ular zikr aytib o‘tirilgan davralarni izlab yurishadi. Shu asnoda zikr bo‘layotgan davrani topishsa, farishtalar zikr halqasidagilar bilan birgalikda o‘tirishadi va bir-birlarini qanotlari bilan o‘rab olishadi, shu tarzda zikrdagi kishilar bilan dunyo osmonining orasi farishtalar bilan to‘lib ketadi. Zikr halqasidagi kishilar tarqalib ketishsa, farishtalar osmonga ko‘tarilib ketishadi.
Keyin Alloh taolo hammasini bilib turgani holda, ulardan: “Qayerdan keldinglar? – deb so‘raydi. Ular: “Biz yerdagi bandalaring oldidan keldik. Ular Senga tasbeh aytyaptilar, takbir, tahlil aytib, Senga maqtov yo‘llayaptilar va O‘zingdan so‘rashyapti”, deb javob qaytarishadi.
Alloh taolo: “Ular Mendan nimani so‘rayapti?” – deydi. Farishtalar javoban: “Sendan jannatingni so‘rashyapti”, deyishadi. Alloh taolo: “Ular jannatimni ko‘rishganmi?” – deya farishtalardan yana savol so‘raydi. Farishtalar javob berib: “Yo‘q! Ey Yaratgan Zot!” – deyishadi. Alloh subhanahu va taolo yana: “Mabodo ular jannatimni ko‘radigan bo‘lsalar, holat qanday bo‘ladi-ya?” – deydi. Farishtalar: “Ular yana Sendan panoh tilashyapti”, deyishadi. Alloh taolo savol tariqasida: “Nimadan panoh berishimni so‘rashyapti?” – deydi.
Ular: “Jahannamingdan, ey Yaratgan Zot!” – deb javob qaytarishadi. “Ular do‘zaximni ko‘rganmi?” – deb so‘raydi Alloh taolo. Javob qaytarib: “Yo‘q!” – deyishadi ular.
Alloh taolo: “Ular do‘zaximni ko‘rishsa qanday bo‘larkin?” – deydi.
Farishtalar: “Ular yana Sendan mag‘firat qilishingni so‘rashyapti”, deyishadi.
Alloh taolo: “So‘zsiz ularning gunohlarini kechirdim, ularga so‘rovlarini ato etdim va panoh tilagan narsalaridan ularni O‘z panohimga oldim”, deydi.
Farishtalar: “Ey Yaratgan Zot! Ular orasida falonchi, o‘ta xatokor qul ham bor. U o‘tib keta turib ularning oldiga o‘tirib oldi”, deyishadi. Alloh taolo shunday deya marhamat qiladi: “Uni ham kechirdim! Ular hammajlislari badbaxt bo‘lmaydigan kishilardir”, deydi»[4], dedilar.
[1] Isro surasi, 44-oyat.
[2] Imom Muslim rivoyati.
[3] Imom Termiziy rivoyati.
[4] Imom Muslim rivoyati.