Kecha, 22 oktyabr kuni Malayziyaning O‘zbekistondagi favqulodda va muxtor elchisi Xendi Assan O‘zbekiston musulmonlari idorasiga keldi. Muftiy Usmonxon Alimov hazratlari elchi bilan muloqot o‘tkazdilar. Uchrashuvda muftiy hazratlari Xendi Assanni elchi etib tayinlangani bilan qutlab, diniy idora faoliyati, diniy ibodatlarni emin-erkin va tinchlik-osoyishtalikda ado etib kelinayotgani, muhtaram Prezidentimiz tashabbuslari bilan juda katta ishlar qilingani haqida gapirib berdilar.
Muloqot davomida muftiy hazratlari bir tarixiy voqeani shunday hikoya qilib berdilar:
– Men Samarqand viloyatidagi Imom Buxoriy masjidida imom-xatib bo‘lib 30 yil ishladim. Ko‘p davlat rahbarlari bilan uchrashdim. Ayniqsa, 1987 yilda Malayziya bosh vaziri Muhammad Muxatir janoblari bilan bo‘lib o‘tgan uchrashuv hamon yodimda. U kishining oliyjanobligi, oqil va dono siyosatchi ekani menda juda katta taassurot qoldirgan. Shundan menda Malayziya xalqiga mehr uyg‘ongan.
Malayziya elchisi Xendi Assan shunday so‘zlarni bayon qildi:
– O‘zbekiston bilan Malayziya davlatlarini bir-biriga bog‘laydigan juda ko‘p rishtalar bor, ayniqsa, Imom Buxoriy nomini eshitganda, butun Malayziya xalqi quvonadi. Muftiy hazrat siz eslab o‘tgan Malayziya bosh vaziri Muhammad Muxatir janoblari esa O‘zbekiston va Malayziya davlatlari o‘rtasidagi aloqalarni o‘rnatgan birinchi diplomat hisoblanadi.
O‘zbekiston hukumati tomonidan Malayziyaga nisbatan vizasiz tartib joriy etilganidan keyin sayyohlar soni ortdi. Bu zaminning ziyorat turizmi borasidagi salohiyati juda katta. Shu yil oktyabr-noyabr oylarida Malayziyaning Salava shtati muftiysi O‘zbekistonga kelishi rejalashtirilgan. Islom ulamolari o‘rtasidagi mana shunday tashriflarning ko‘payishi juda yaxshi natijalarni beradi.
Uchrashuv do‘stona va samimiy ruhda o‘tdi.

O‘zbekiston musulmonlari idorasi Matbuot xizmati