Avval, O‘zbekiston musulmonlari idorasi raisi, muftiy Usmonxon Alimov Islom olami uyushmasi Oliy kengashining 43-sessiyasida ishtirok etish uchun Saudiya Arabistoniga jo‘nab ketgani haqida xabar qilgan edik.
Bugun 18 oktyabr, payshanba kuni Makkai mukarrama shahrida Uyushma Oliy kengashining 43-sessiyasi o‘z ishini boshladi.
An’anaga muvofiq, sessiya Qur’oni karim tilovati bilan boshlandi. Shundan so‘ng Saudiya Arabistoni bosh muftiysi Shayx Abdulaziz ibn Abdulloh Oli Shayx anjuman ishtirokchilarini qutlab, Uyushmaning navbatdagi 43-sessiyasi ishiga muvaffaqiyat tiladi.
Ushbu anjumanda dunyodagi nufuzli ulamolar, kengash a’zolari, shu jumladan, O‘zbekiston musulmonlari idorasi raisi, muftiy Usmonxon Alimov hazratlari ham ishtirok etmoqdalar. Bugun anjuman ishida Suriya, Iroq, Filippin davlatlarida tinchlik va osoyishtalikni ta’minlashga oid masalalar ko‘rib chiqiladi. Shuningdek, Uyushma Oliy kengashining bir yillik hisoboti ham taqdim etiladi.
Anjumanda muhokama qilinayotgan masalalar haqida saytimizda batafsil yoritib boramiz.
O‘zbekiston musulmonlari idorasi Matbuot xizmati
#xabar #haj2025
Bugun kechqurun 15 ming o‘zbekistonlik ziyoratchilar Makkai mukarramadagi mehmonxonalardan haj ibodatining asosiy amallarini bajarish uchun Mino vodiysiga yo‘l oladilar.
Aytish joizki, bugungi kungacha O‘zbekiston ishchi guruhi vakillari tomonidan ziyoratchilarimiz ulug‘ ibodatni bekamu ko‘st ado etishlari uchun Mino, Arofat va Muzdalifa vodiylarida barcha shart-sharoitlar to‘liq tayyor holatga keltirilgan.
Ayni maqsadda ishchi guruhi va shifokorlarning ma’lum a’zolari mazkur muborak vodiylarda bir muddat oldin borib, ziyoratchilarimizni kutib olishga shay bo‘lib turibdilar.
Xususan, bu yil, O‘zbekiston tomonining talabiga muvofiq, Arafot hududidagi chodirlar yopiq tarzda barpo etildi. Ularning atrofi issiq o‘tkazmaydigan panellar bilan o‘ralgan, sovutish tizimi o‘rnatilgan, gilam va to‘shaklar solingan. Bu hozirgi yoz kunlarida ziyoratchilarga qo‘shimcha qulaylik yaratadi.
Shuningdek, barcha sharoitlarga ega tibbiyot markazlari, 3 mahal issiq ovqat va 24 soat davomida choy va salqin ichimliklar bilan ta’minlash yo‘lga qo‘yiladi. Arafotda Muzdalifada foydalanish uchun hojilarga maxsus to‘shak va soyabonlar tarqatish rejalashtirilgan.
Ayni paytgacha soha rahbarlari tomonidan ishchi guruhi a’zolari, ellikboshilar va shifokorlar jamoasiga haj jarayonlarini namunali boshqarish, belgilangan tartiblarga rioya etish va shar’iy masalalar haqida batafsil tushuntirildi.
O‘zbekiston musulmonlari idorasi
Matbuot xizmati