Avval, O‘zbekiston musulmonlari idorasi raisi, muftiy Usmonxon Alimov Islom olami uyushmasi Oliy kengashining 43-sessiyasida ishtirok etish uchun Saudiya Arabistoniga jo‘nab ketgani haqida xabar qilgan edik.
Bugun 18 oktyabr, payshanba kuni Makkai mukarrama shahrida Uyushma Oliy kengashining 43-sessiyasi o‘z ishini boshladi.
An’anaga muvofiq, sessiya Qur’oni karim tilovati bilan boshlandi. Shundan so‘ng Saudiya Arabistoni bosh muftiysi Shayx Abdulaziz ibn Abdulloh Oli Shayx anjuman ishtirokchilarini qutlab, Uyushmaning navbatdagi 43-sessiyasi ishiga muvaffaqiyat tiladi.
Ushbu anjumanda dunyodagi nufuzli ulamolar, kengash a’zolari, shu jumladan, O‘zbekiston musulmonlari idorasi raisi, muftiy Usmonxon Alimov hazratlari ham ishtirok etmoqdalar. Bugun anjuman ishida Suriya, Iroq, Filippin davlatlarida tinchlik va osoyishtalikni ta’minlashga oid masalalar ko‘rib chiqiladi. Shuningdek, Uyushma Oliy kengashining bir yillik hisoboti ham taqdim etiladi.
Anjumanda muhokama qilinayotgan masalalar haqida saytimizda batafsil yoritib boramiz.
O‘zbekiston musulmonlari idorasi Matbuot xizmati
Hadis ilmi maktabi qoshidagi "Qur’oni karim va tajvid" o‘quv kursida tahsil olgan 51-davra tinglovchilari uch oylik saboq olish mashg‘ulotlarini muvaffaqiyatli yakunladilar.
Shu munosabat bilan tinglovchilarga maxsus sertifikatlar topshirildi. Tadbirda Hadis ilmi maktabi mutasaddi rahbarlari ishtirok etib, tinglovchilarga Qur’on tilovati va ilm yo‘lida lozim bo‘ladigan muhim tavsiyalarini berishdi.
Shuningdek, "Ko‘kaldosh" o‘rta maxsus islom bilim yurti qoshidagi "Qur’oni karim va tajvid" o‘quv kursining navbatdagi 57-davra mashg‘ulotlari ham yakunlandi.
O‘zbekiston musulmonlari idorasi
Matbuot xizmati