Inson yashar ekan, avvalo, unga bilim va ma’rifat dunyosi sari yo‘l ochib bergan, uning qalbiga yuksak insoniy fazilatlar hissini singdirish yo‘lida zahmat chekkan ustoz va murabbiylariga nisbatan ko‘nglida hamisha minnatdorlik tuyg‘usi bilan yashaydi.

Buxoroning buyuk imomlaridan biri, dars majlisida o‘tirganlarida, dars orasida ba’zan turib o‘tirar ekan. Shu haqda undan so‘rashibdi. Ul zot: “Ustozimning o‘g‘li bolalar bilan ko‘chada uynab yuribdi. Ahyonda masjid eshigiga kelib ketar edi. Uni har ko‘rganimda ustozimning ta’zimi uchun unga o‘rnimdan turar edim”, debdilar.

Mana tarbiya, mana ustozga bo‘lgan hurmat. Ustoz ota kabi, ulug‘ zot deydi xalqimiz.

Bir kishidan:

   – Nima uchun ustozingni otangdan afzalroq hurmat qilasan? – deb so‘radilar.

   – Chunki, otam meni o‘tkinchi dunyoga olib keldi, ustozim esa boqiy hayot bag‘ishladi, – deb javob berdi.

Ko‘z  nuri va qalb qo‘rini ustozdek mashaqqatli va fidokorona kasbga bag‘ishlagan azizlarimizni samimiy qutlab, minnatdorchilik bildirish biz shogirdlar uchun ham qarz, ham farzdir!

Shunga asosan bugun Toshkent islom institutida 1 oktyabr – O‘qituvchi va murabbiylar kuni munosabati bilan “Ustozlar sizga ta’zim” deb nomlangan ma’naviy-ma’rifiy tadbir bo‘lib o‘tdi. Tadbirda O‘zbekiston musulmonlari idorasi rais maslahatchisi Abdulhamid domla Tursunov, Din ishlari bo‘yicha qo‘mita “Diniy-ma’rifiy ta’lim muassasalari bilan ishlash bo‘limi” boshlig‘i Bobomurod Rustamov, O‘MI Ta’lim bo‘limi mutaxassisi Salohiddin Sherxonov, TII sobiq rektori Abduqayum domla Azimov, faxriy imom Rahmatulloh qori Obidov, faxriy o‘qituvchilar Ilhomjon domla Eshonjonov, Ahmadjon domla Bobomurodzoda, Zokirjon domla Sharipov hamda institutmizning o‘qituvchi-murabbiylari va talabalari ishtirok etdi.

Tadbirda Toshkent islom instituti rektori Uyg‘un G‘afurov kirish so‘zi bilan  ochib, o‘qituvchilik kasbi, uning mashaqqatlari haqida gapirdi. So‘ngra, O‘MI raisi muftiy Usmonxon Alimov hazratlarining o‘qituvchilarga yo‘llagan tabrigini e’tirof etib o‘tdi. Tadbirda so‘zga chiqqanlar barchani qutlug‘ ayyom – O‘qituvchi va murabbiylar kuni bilan samimiy muborakbod etdilar.

Shuningdek tadbirda “O‘qituvchi va murabbiylar kuni” munosabati bilan Toshkent islom instituti faoliyatida fidokorona mehnati, institut faoliyatini rivojlantirish, diniy-ma’rifiy ishlar samaradorligini oshirishga qo‘shgan munosib hissasi, jamoat tadbirlarida faol ishtirok etgani, yosh avlodni tarbiyalashda yoshlarimiz qalbi va ongiga ona Vatanga muhabbat va sadoqat tuyg‘usini singdirish, ularni turli tahdidlardan asrash, komil inson etib voyaga yetkazish yo‘lidagi ko‘rsatgan beqiyos xizmatlari uchun bir guruh ustoz murabbiylar institut tomonidan faxriy yorliq va tashakkurnomalar shuningdek, faxriy o‘qituvchi va ustozlarga esdalik sovg‘alari taqdim etildi.

Aziz ustozlar, mo‘tabar murabbiylar!!!

Barcha ustozlarimizni institutimiz jamoasi nomidan – O‘qituvchi va murabbiylar kuni bilan chin qalbimizdan samimiy muborakbod etamiz. Ustozlik maqomi – oliy saodat. Kamolot yo‘lida bizga saboq, hayotda o‘z o‘rnimizni topishimizga ko‘mak bergan muxtaram ustozu muallimlarimiz oldida bir umr qarzdormiz. Alloh sharafli va mas’uliyatli kasbda sobitqadam bo‘lgan aziz ustoz-muallimlarimizga tuganmas kuch-quvvat, mehr-muhabbat bersin, ilmu bilimlarini yanada ziyoda qilsin, ikki dunyo saodatiga musharraf etsin!

Farzand va shogirdlaringiz baxti va kamolini ko‘rish doimo sizlarga nasib etsin. Mashaqqatli va sharafli kasbingizda ulkan yutuqlar, xonadoningizga doimiy xotirjamlik va sihat-salomatlik tilaymiz.

manba