Avvalroq, Malayziyaning Perlis shtati muftiysi Moxd Asri Bin Zaynul Abidin boshchiligidagi diniy ulamolardan iborat delegatsiya shu kunlarda Yurtimizda mehmon bo‘lib turibdilar hamda O‘zbekistonning diqqatga sazovor joylarini ziyorat qilayotgani haqida xabar bergan edik.

Ular O‘zbekiston musulmonlari idorasiga qarashli Ko‘kaldosh o‘rta maxsus islom bilim yurti, Minor jome masjidi, Chorsu dehqon bozori va boshqa ko‘plab manzillarga sayohat uyushtirdilar.

Malayziyalik mehmonlar Samarqand shahrini ziyorat qildilar. Dastavval mehmonlar Imom Buxoriy majmuasiga tashrif buyurdilar. Ularni Samarqand viloyati Bosh imom-xatibi Zayniddin domla Eshonqulov kutib olib, tashrifi bilan qutladi hamda majmuani ziyorat qildirdi. Ziyorat davomida mehmonlarga muhaddis olim Imom Buxriy hayoti, u kishining faoliyati haqida batafsil ma’lumot berildi.
Shundan keyin mehmonlar Samarqand shahridagi boshqa diqqatga sazovor joylarni ziyorat qildilar. Registon maydoni, Shohi Zinda, Go‘ri Amir, Hazrati Hizr majumalari shular jumlasidandir.

Mehmonlar sayohat uchun minnatdorlik bildirib, ushbu qadamjolarga tashrif haqida mamnuniyat bilan so‘zladilar. Samarqand shahridagi qadamjolar mehmonlarda katta taassurot qoldirdi. Milliy me’morchiligimiz, qadim obidalarimiz, taomlarimiz xorij delegatsiyasining alohida e’tiborini qozondi.
Mehmonlar Samarqand bo‘ylab ziyoratini yakunlab Buxoro shahriga jo‘nab ketdi.

Portalimizni kuzatishda davom eting.

O‘MI Matbuot xizmati