Savollarga O‘zbekiston musulmonlari idorasi Fatvo hay’ati javob beradi.
Savol: Assalomu alaykum. Savolim shuki junub bo‘lgan kishi g‘usl qilmasdan oldin birovga gapirishi, ko‘chaga chiqishi, ovqat yeyishi, suv ichishi mumkin emasmi? Javobingiz uchun oldindan rahmat.
Javob: Va alaykum assalom. Shu ishlardan oldin g‘usl qilib olgan yaxshidir.
Savol: Assalomu alaykum men yana sizga savol bilan murojaat qilmoqchiman Yujniy Koreya davlatida yashayman namoz o‘qimoqchiman, duo qilmoqchiman lekin qiblani hech aniqlab ololmayapman kompas yuklab oldim, aniq ko‘rsatmayapti, qaysi tarafga qarab o‘qishni bilmayapman. So‘rab surishtirdim hamma aytdiki, muslim pro dasturida kompas bor deyishdi, lekin kompas aniq ko‘rsatmayapti. Javob uchun oldindan katta rahmat
Javob: Va alaykum assalom. Agar qiblani biladigan inson yo‘q bo‘lsa, shuni boshqa yo‘l bilan ham aniqlashning imkoni topilmasa, unda o‘zingiz o‘z fikringizga tayanib bir tarafni qibla deb qasd qilasiz va shu tarafga qarab namoz o‘qiysiz.
Savol: Assalomu alaykum. Savolim qo‘yidagicha, 2017 yilning iyun oyida o‘g‘illik bo‘lgan edik shunga qaramay ayolim yana homilador bo‘lib qolibdi. Gap shundaki bolani dunyoga keltirishni sog‘ligi ko‘tara olarmikin deb qo‘rqayapmiz. Ayolimda belining ikki joyida grijasi (disk churrasi) bor. Har doim belida og‘riq bor. Bolani oldirish gunoh ammo sog‘ligini ham o‘ylashimiz kerak. Sizlardan iltimos maslahat bersangizlar.
Javob: Va alaykum assalom. Agar biror ishonchli omonatdor shifokor homilani ona yoki bola hayotiga jiddiy xavfi borligini aytsa va shu paytda homila bir yuz yigirma kunlik bo‘lmagan bo‘lsa unda ulamolarimiz bunday homilani oldirib tashlashga ruxsat berganlar.
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Sayyid Sulaymon Nadaviy rahmatullohi alayhning ilm va fazllari mashhur bo‘layotgan va shuhrat qozonayotgan edi. U kishi o‘zlarining voqealarini quyidagicha so‘zlab beradilar: «Men «Siyratun-Nabiy sollallohu alayhi vasallam» kitobini olti jild qilib tamomladim. «Muhtaram Zotning siyratlaridagi biror jilva yoki ko‘rinish mening hayotimda ham bo‘lganmi yoki yo‘q? Agar bo‘lmagan bo‘lsa, u holda qanday bo‘ladi?» degan o‘y qayta-qayta qalbimda tinchlik bermas edi. Shu maqsad uchun Allohning biror valiysini qidirdim.
Thana Bhavandagi xonaqohda yashaydigan va Alloh taolo fayzlarini taratib qo‘ygan Mavlono Ashraf Ali Tahonaviy hazratlari haqida eshitgan edim. Shunday qilib, bir kuni Thana Bhavanga borishni niyat qildim va safarga chiqdim. Borib, hazrat bilan ko‘rishdim va bir necha kun u yerda turdim. Ortga qaytayotganimda hazrat Tahonaviy rahmatullohi alayhga: «Hazrat! Biror nasihat qiling», dedim. U zotning xayollariga o‘sha payt: «Shunday katta allomaga nima nasihat qilaman? Ilm va fazli butun dunyoga mashhur bo‘lsa», degan o‘y kelibdi. Keyin: «Ey Alloh! Qalbimga uning uchun ham foydali bo‘lgan va mening uchun ham foydali bo‘lgan narsani sol», deb duo qilibdi. Shundan keyin hazrat Tahonaviy rahmatullohi alayh Sayyid Sulaymon Nadaviy rahmatullohi alayhga xitob qilib: «Ey birodar! Bizning yo‘limizda boshidan oxirigacha o‘zingizni xokisor tutishingiz kerak», debdilar.
Sayyid Sulaymon Nadaviy rahmatullohi alayh aytadilar: «Hazrat Tahonaviy rahmatullohi alayh bu so‘zlarni aytayotganlarida qo‘llarini ko‘ksilariga olib borib, past tarafiga bir zarba berdilar, zarba xuddi mening qalbimga tushgandek bo‘ldi».
Hazratimiz Doktor Abdulhay rahmatullohi alayh aytadilar: «Bu voqeadan keyin Sayyid Sulaymon Nadaviy rahmatullohi alayh o‘zlarini shunday xokisor tutdilarki, uning misli topilishi qiyin edi. Bir kuni qarasam, xonaqohning tashqarisida hazrat Sayyid Sulaymon Nadaviy rahmatullohi alayh majlisga kelganlarning oyoq kiyimlarini tartiblayotgan ekanlar. Shunday tavoze’ va muhabbatni Alloh taolo u kishining qalbida paydo qildi va keyin yuksak darajalarga ko‘tarib qo‘ydi».
«Nasihatlar guldastasi» kitobidan