O‘zbekiston musulmonlari idorasi muassisligida “Muslim-tour” sayyohlik firmasi o‘z faoliyatini boshladi. Bunday faoliyat olib borish uchun Turizmni rivojlantirish davlat qo‘mitasining litsenziyasini qo‘lga kiritildi. Unga ko‘ra, turizm faoliyatini kirish, chiqish va ichki turizm yo‘nalishlarini amalga oshirish huquqini berish qayd etilgan.

2016 yil 2 dekabrdagi O‘zbekiston Respublikasi Prezidentining “O‘zbekiston Respublikasining turizm sohasini jadal rivojlantirishni ta’minlash chora-tadbirlari to‘g‘risida”gi   farmoni, shuningdek, yurtimizda turizm sohasini rivojlantishga qaratilgan izchil sa’y-harakatlarga hamohang tarzda endilikda O‘zbekiston musulmonlari idorasi ham ziyorat turizmni rivojlantirishga o‘znining munosib hissasini qo‘shadi.

O‘zbekiston musulmonlari idorasi huzuridagi “Muslim-tour” sayyohlik firmasi yurtimizdagi qadamjo, ziyoratgoh va tabarruk maskanlarga mahalliy va xorijiy fuqarolarning keng ko‘lamdagi ziyoratlarini uyushtirish, ziyoratchilar uchun munosib shart-sharoitlar yaratish va musulmon dunyosidagi nufuzini yanada oshirishga ham xizmat qiladi.

Davlatimiz Rahbari tashabbusi bilan O‘zbekistonda ziyorat turizmini rivojlantirish bo‘yicha keng ko‘lamli amaliy ishlar va normativ hujjatlar qabul qilindi. Yaqinda Samarqand shahrida Ipak yo‘li turizm xalqaro universitetining tashkil etish to‘g‘risidagi Prezident qarori esa bu borada olib borilayotgan ishlarni yangi pog‘onaga ko‘taradi. Shuningdek, kelgusida Toshkent-Jidda-Toshkent aviaqatnovining yo‘lga qo‘yilishi yanada kengroq imkoniyatlar eshigini ochadi.

O‘zbekiston musulmonlari idorasi Matbuot xizmati