Sayt test holatida ishlamoqda!
13 Iyun, 2025   |   17 Zulhijja, 1446

Toshkent shahri
Tong
03:04
Quyosh
04:49
Peshin
12:28
Asr
17:38
Shom
20:00
Xufton
21:38
Bismillah
13 Iyun, 2025, 17 Zulhijja, 1446

“Haj – 2023” ishchi guruhi zimmasiga katta mas'uliyat yuklandi

02.06.2023   1348   3 min.
“Haj – 2023” ishchi guruhi zimmasiga katta mas'uliyat yuklandi

Shu yil 1 iyun' kuni “Haj – 2023” mavsumini namunali o'tkazish yuzasidan navbatdagi majlisi bo'lib o'tdi. Unda O'zbekiston musulmonlari idorasi raisi, muftiy Nuriddin domla hazratlari, Din ishlari bo'yicha qo'mita raisi Sodiqjon Toshboyev, ishchi guruhi va oshpazlar jamoalari ishtirok etdi.

Yig'ilishda Muftiy Nuriddin domla hazratlari haj qiluvchi inson Haq taoloning mehmoni ekani, haj amalini bajarayotgan kishiga ko'mak bergan, uning og'irini engil qilgan inson ulug' savob va darajotlarga noil bo'lishini so'zlab, har bir ishchi guruhi a'zosi ana shunday ulug' darajalarni maqsad qilib, Rahmonning mehmonlariga O'zi rozi bo'ladigan darajada sidqidildan xizmat qilishni alohida qayd etdilar. Shuningdek, ishchi guruhi jamoalarining har bir a'zosi mavsum davomida o'ziga yuklatilgan vazifalarni mukammal bajarishi haqida ham alohida ta'kidladilar.

Muftiy hazratlari ziyoratchilar bilan muntazam ulug' ibodat haqida suhbatlar tashkil etish, Fatvo markazi ulamolari bilan uchrashuvlar uyushtirish va ijtimoiy tarmoqlarda safarga oid ma'lumotlar joylashtirib borishni alohida qayd etdilar.

Din ishlari bo'yicha qo'mita raisi Sodiqjon Toshboyev ziyoratchilarning ibodatlari mukammal bo'lishi uchun ularga qulay shart-sharoitlarni muhayyo qilish borasida Makka va Madina shaharlaridagi haj ishchi guruhi a'zolari bir necha kundan beri faoliyat olib borayotgani, aviqatnovlar jadvali tasdiqlangani, viza rasmiylashtirish ishlari davom etayotgani, mehmonxonalar ziyoratchilarni kutib olishga tayyor holga keltirilgani, mutasaddi tashkilotlar bilan amalga oshiriladigan ishlar kelishib olingani, Mino, Arafot va Muzdalifadagi joylar ko'zdan kechirilgani haqidagi muhim ma'lumotlarni taqdim etdi. Shuningdek, joriy mavsumda “Haj – 2023” ishchi guruhi zimmasida juda katta mas'uliyat turganini aytib, har bir ishchi guruhi a'zosidan o'z vazifasini to'la bajarishi zarurligini ta'kidladi.

Avvalo haj safarini ado etish baxtiga muyassar bo'lgan yurtdoshlarimiz muborak zamindagi har bir onlarini mazmunli o'tkazishi, bu kunlarning har bir soniyasini g'animat bilib, undan foyda olib qolishlari yo'lida bor kuch-g'ayratni sarflashi darkorligi so'zlandi.

Tadbir yakunida har bir ishchi guruhiga belgilangan mehnat taqsimoti tushuntirildi.

Avval «Haj – 2023» mavsumiga tayyorgarlik ko'rish va uni tartibli o'tkazish yuzasidan videobayonot e'lon qilindi.

O'zbekiston musulmonlari idorasiMatbuot xizmati

O'zbekiston yangiliklari
Boshqa maqolalar

Qalbingizni zabonsiz toshga aylantirib qo‘ymang.

09.06.2025   6098   4 min.
Qalbingizni zabonsiz toshga aylantirib qo‘ymang.

Har yangi kunning tongini ko‘rganingizda qalbingizni zikr ila to‘ldiring. Iymon zikrlariga quloq tutar ekansiz, borliq Yaratgan Zot sari talpinayotganini his qilasiz. Alloh taolo aytadi: «...Mavjud bo‘lgan barcha narsa hamd bilan Unga tasbeh aytur...»[1]. Balki uyda, balki ko‘chada, qayerda bo‘lsangiz-da, Allohning zikriga shoshiling. Zikrlarni ko‘paytirganingiz sari Allohga bo‘lgan muhabbatingiz ortib boradi, osmonlaru yerning Xoliqi bo‘lgan Alloh taolodek buyuk Zot suyanchig‘ingiz ekanini anglaysiz...

Ushbu misralarni doim yodda tuting:

Gar ersa qalblar Xoliqin zikridin mosuvo,
Alar jasad ichidin joy olgan tosh kabi go‘yo.

Qalbingizni zabonsiz toshga aylantirib qo‘ymang.
Toshda na mehr va na his bor. Payg‘ambarimiz sollallohu alayhi vasallam: “Robbini zikr qiladigan bilan zikrdan yiroqda bo‘lgan kishi xuddi tirik bilan o‘lik kabidir” [2],  deganlar.

Yana Nabiy alayhissalom: “Sizlarga amallaringizning eng xayrlisi va Sultoningiz huzurida eng pokiza, darajangizni yuqorilatadigan, sizlar uchun tillo-kumushlarni ehson qilgandan-da, dushmaningizga yo‘liqib, uning boshini tanasidan judo qilishingiz, u ham sizning kallangizni bo‘yningizdan uzib tashlashidan-da yaxshiroq amal qaysi ekanini bildirib qo‘yaymi?!” dedilar. Sahobalar: ”Ha, ey Allohning Rasuli”, deyishdi. U zot: U Allohning zikridir”,3] dedilar.

Ubayd ibn Umayr aytadilar: “Mo‘minning amal daftaridagi hamd ila tasbeh – u bilan dunyo tog‘laricha tillo sudralib yurishidan xayrlidir”.

Nabiy alayhissalom yana boshqa bir hadisda: «Alloh taoloning fazilat izlab kezib yuruvchi farishtalari bo‘lib, ular zikr aytib o‘tirilgan davralarni izlab yurishadi. Shu asnoda zikr bo‘layotgan davrani topishsa, farishtalar zikr halqasidagilar bilan birgalikda o‘tirishadi va bir-birlarini qanotlari bilan o‘rab olishadi, shu tarzda zikrdagi kishilar bilan dunyo osmonining orasi farishtalar bilan to‘lib ketadi. Zikr halqasidagi kishilar tarqalib ketishsa, farishtalar osmonga ko‘tarilib ketishadi.

Keyin Alloh taolo hammasini bilib turgani holda, ulardan: “Qayerdan keldinglar? – deb so‘raydi. Ular: “Biz yerdagi bandalaring oldidan keldik. Ular Senga tasbeh aytyaptilar, takbir, tahlil aytib, Senga maqtov yo‘llayaptilar va O‘zingdan so‘rashyapti”, deb javob qaytarishadi.

Alloh taolo: “Ular Mendan nimani so‘rayapti?” – dey­di. Farishtalar javoban: “Sendan jannatingni so‘rashyapti”, deyishadi.  Alloh taolo: “Ular jannatimni ko‘rishganmi?” – deya farishtalardan yana savol so‘raydi. Farishtalar javob berib: “Yo‘q! Ey Yaratgan Zot!” – deyishadi. Alloh subhanahu va taolo yana: “Mabodo ular jannatimni ko‘radigan bo‘lsalar, holat qanday bo‘ladi-ya?” – deydi. Farishtalar: “Ular yana Sendan panoh tilashyapti”, deyishadi. Alloh taolo savol tariqasida: “Nimadan panoh berishimni so‘rashyapti?” – deydi.

Ular: “Jahannamingdan, ey Yaratgan Zot!” – deb javob qaytarishadi. “Ular do‘zaximni ko‘rganmi?” – deb so‘raydi Alloh taolo. Javob qaytarib: “Yo‘q!” – deyishadi ular.

Alloh taolo: “Ular do‘zaximni ko‘rishsa qanday bo‘larkin?” – deydi.

Farishtalar: “Ular yana Sendan mag‘firat qilishingni so‘rashyapti”, deyishadi.

Alloh taolo: “So‘zsiz ularning gunohlarini kechirdim, ularga so‘rovlarini ato etdim va panoh tilagan narsalaridan ularni O‘z panohimga oldim”, deydi.

Farishtalar: “Ey Yaratgan Zot! Ular orasida falonchi, o‘ta xatokor qul ham bor. U o‘tib keta turib ularning oldiga o‘tirib oldi”, deyishadi. Alloh taolo shunday deya marhamat qiladi: “Uni ham kechirdim! Ular hammajlislari badbaxt bo‘lmaydigan kishilardir”, deydi»[4]dedilar. 

 


[1]  Isro surasi, 44-oyat.
[2]  Imom Muslim rivoyati.
[3]  Imom Termiziy rivoyati.
[4]  Imom Muslim rivoyati.