Iordaniya hoshimiylar qirolligidagi Tafiliya texnika universitetining (TTU) arab adabiyoti fakulteti tashabbusi bilan “Qur’on mo‘jizasining yangi adabiy tadqiqotlari” mavzuida xalqaro konferensiya bo‘lib o‘tdi.

“Al-arab al-yavm” xabariga ko‘ra, anjumanni kirish so‘zi bilan ochgan TTU rektori Muhammad Xayr Xuroniy: "Universitet professorlari talabalar uchun ularni to‘g‘ri yo‘lga boshlovchi intellektual rahbarlar va boshqaruvchilar hisoblanadi, Qur’on qissalari esa ularga hayotiy saboq beradi  hamda fikr yuritishga undaydi”, degan.

Uch kun davom etgan  konferensiyada “Dialog madaniyati”, “Qur’oni karim qissalarida ayol timsoli”, “Qur’oni karim qissalari xususiyati”, “Qur’oni karim qissalarida ramz”  va  “Qur’oni karim tafsirlarida  Qur’on qissalari”  kabi mavzular o‘rganildi.

Iroq  universiteti professori Taha Keysi  mazkur forum olimlar va tadqiqotchilar bilan uchrashish uchun yaxshi imkoniyat bo‘lganini aytib, jumldan, shunday dedi: “Iordaniya universitetlari ilmiy konferensiyalar va seminarlar o‘tkazish uchun ko‘p ishlarni amalga oshirmoqda”.

Eslatib o‘tamiz, konferensiyada ekspertlar va olimlar ishtirokida diniy, ijtimoiy va siyosiy mavzular bo‘yicha ilmiy munozaralar o‘tkazildi.

  Xalqaro aloqalar bo‘limi