Garuda Indonesia havo yo‘llari kompaniyasi indoneziyalik ziyoratchilarni Saudiya Arabistonining muqaddas Makka shahriga Haj ziyoratiga eltish uchun 14 ta samolyot ajratdi. Bu haqda "mba.aero" xabar berdi.

Garuda Indonesia mamlakatning Din ishlari bo‘yicha vazirligi bilan shu haqda anglashuv memorandumi imzoladi.

Din ishlari bo‘yicha vazirlikning Haj bo‘limi direktori X.Nizar Garuda Indonesia aviakompaniyasi Haj ziyoratchilariga yuqori saviyada xizmat ko‘rsatishiga umid bildirgan.

O‘z navbatida kompaniya prezidenti Paxala Mansuri bu yil Indoneziyadan Haj ziyoratiga boradigan 221 ming hojidan 107 ming nafariga Garuda Indonesia shirkati o‘zining eng yaxshi samolyotlarda xizmat ko‘rsatishini ta’kidladi.

"Jakarta Post" nashri xabariga ko‘ra, Garuda Indonesia aviashirkati 107 ming ziyoratchini mamlakatning to‘qqizta shahridan Hajga eltish va ortga qaytarish uchun 278 ta reysni amalga oshirishni rejalagan.

O‘MI Matbuot xizmati