Haj amalini bajarishga otlangan tatristonliklar 2018 yildagi safar uchun 10-15 ming rubl miqdorida qo‘shimcha mablag‘ to‘lashlari ma’lum qilindi. Bu haqda “Tatar-inform” axborot agentligiga Tatariston musulmonlari idorasining rasmiy Haj-operatori ma’lum qilgan.

Agentlik vakili bergan ma’lumotlarga ko‘ra, Saudiya Arabistoni 2018 yildan boshlab 5 foiz miqdoridagi soliq joriy etgan. Shu sababli Saudiya Arabistonida ishlab chiqariladigan mahsulotlar va xizmatlar (turar joy, ovqatlanish va ziyoratchilarga xizmat ko‘rsatish) narxi qimmatlashgan. TMI qoshidagi “TMI Haj” agentligi bir qancha dasturlarni taklif qilgan. Hajga borish uchun talab etiladigan eng kam to‘lov 139 ming rubl (20 million so‘m atrofida, Markaziy Bank o‘rnatgan kurs bo‘yicha hisoblandi) ekani aytilmoqda. Bundan tashqari 149 (21 million so‘m), 165 (23 million so‘m), 235 ming (33 million so‘m) rubllik yo‘llanmalar borligi ma’lum qilingan. “Luks” Haj uchun 375 ming (53 million so‘m) rubl to‘lanishi aytilgan.

O‘MI Matbuot xizmati