Jahonning eng konservativ mamlakatlaridan sanalmish Saudiya Arabistoni 2018 yilning 1 aprelidan xohlovchilarning bariga turistik va biznes vizalar berishga qaror qildi. Shu yo‘l bilan Saudiya iqtisodiyotni rivojlantirmoqchi va uni neftga qaramlikdan xalos qilmoqchi.
Daily Mail ning ma’lum qilishicha, valiahd shahzoda Muhammad ibn Salmon tomonidan amalga oshirilayotgan bunday islohotlar 2030 yilga kelib mamlakatga sayyohlar oqimining yiliga 30 mln kishigacha yetishiga olib keladi, 2020 yilgacha esa turizm sohasiga investitsiyalar $ 54 mlrd gacha yetadi.
«Alloh taolo zaminimizga neftdan ham qimmatliroq boylikni ato etganini yaxshi anglaymiz, – dedi shahzoda. – Mamlakatimizda ikki Muqaddas Masjid va dunyodagi eng muqaddas qadamjo – Ka’batulloh bor. Har kuni dunyodagi milliardlab musulmonlar unga qarab namoz o‘qishadi».
Turizm va qadimiy obidalar qo‘mitasi rahbari Sulton ibn Salmon ibn Abdulaziz yangi turistik vizaning bahosi hozircha aniqlanmaganini, ammo u qimmat bo‘lmasligini aytdi. Chunki turizmdan keladigan iqtisodiy foyda viza narxlaridan olinadigan foydadan ancha ko‘pdir, dedi u.
Hozir Saudiya Arabistoni ma’lum davlatlar fuqarolariga viza beradi, lekin shunda ham qator talablar va cheklovlar bilan. Masalan, sayyoh faqat akkreditatsiyadan o‘tgan shirkat orqali mamlakatga kelishi va belgilangan mehmonxonalarda turishi kerak.
info.islom.uz
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Sayyid Sulaymon Nadaviy rahmatullohi alayhning ilm va fazllari mashhur bo‘layotgan va shuhrat qozonayotgan edi. U kishi o‘zlarining voqealarini quyidagicha so‘zlab beradilar: «Men «Siyratun-Nabiy sollallohu alayhi vasallam» kitobini olti jild qilib tamomladim. «Muhtaram Zotning siyratlaridagi biror jilva yoki ko‘rinish mening hayotimda ham bo‘lganmi yoki yo‘q? Agar bo‘lmagan bo‘lsa, u holda qanday bo‘ladi?» degan o‘y qayta-qayta qalbimda tinchlik bermas edi. Shu maqsad uchun Allohning biror valiysini qidirdim.
Thana Bhavandagi xonaqohda yashaydigan va Alloh taolo fayzlarini taratib qo‘ygan Mavlono Ashraf Ali Tahonaviy hazratlari haqida eshitgan edim. Shunday qilib, bir kuni Thana Bhavanga borishni niyat qildim va safarga chiqdim. Borib, hazrat bilan ko‘rishdim va bir necha kun u yerda turdim. Ortga qaytayotganimda hazrat Tahonaviy rahmatullohi alayhga: «Hazrat! Biror nasihat qiling», dedim. U zotning xayollariga o‘sha payt: «Shunday katta allomaga nima nasihat qilaman? Ilm va fazli butun dunyoga mashhur bo‘lsa», degan o‘y kelibdi. Keyin: «Ey Alloh! Qalbimga uning uchun ham foydali bo‘lgan va mening uchun ham foydali bo‘lgan narsani sol», deb duo qilibdi. Shundan keyin hazrat Tahonaviy rahmatullohi alayh Sayyid Sulaymon Nadaviy rahmatullohi alayhga xitob qilib: «Ey birodar! Bizning yo‘limizda boshidan oxirigacha o‘zingizni xokisor tutishingiz kerak», debdilar.
Sayyid Sulaymon Nadaviy rahmatullohi alayh aytadilar: «Hazrat Tahonaviy rahmatullohi alayh bu so‘zlarni aytayotganlarida qo‘llarini ko‘ksilariga olib borib, past tarafiga bir zarba berdilar, zarba xuddi mening qalbimga tushgandek bo‘ldi».
Hazratimiz Doktor Abdulhay rahmatullohi alayh aytadilar: «Bu voqeadan keyin Sayyid Sulaymon Nadaviy rahmatullohi alayh o‘zlarini shunday xokisor tutdilarki, uning misli topilishi qiyin edi. Bir kuni qarasam, xonaqohning tashqarisida hazrat Sayyid Sulaymon Nadaviy rahmatullohi alayh majlisga kelganlarning oyoq kiyimlarini tartiblayotgan ekanlar. Shunday tavoze’ va muhabbatni Alloh taolo u kishining qalbida paydo qildi va keyin yuksak darajalarga ko‘tarib qo‘ydi».
«Nasihatlar guldastasi» kitobidan