Rossiya Federatsiyasi tarkibidagi Ingushetiya Respublikasi poytaxti Magasda yirik islomiy markaz qurilishi rejalashtirilmoqda. Ushbu qurilayotgan Islom majmuasiga moliyaviy yordamni qatarlik investorlar ko‘rsatishi ma’lum qilindi. Bu haqda Islam-today.ru nashri xabar qildi.

Ingushetiya rahbari Yunusbek Yevkurovning aytishicha, majmua respublikadagi yirik madaniy-ma’rifiy, diniy va tarbiyaviy markazga aylanadi.

Ta’kidlash joizki, Qatar Islom majmuasidan tashqari Ingushetiyada bolalar bog‘chasi, uy-joy qurish kabi bir qancha ijtimoiy loyihalarni amalga oshirmoqda.

Obyektlarning qurilish ishlari joriy yilda boshlanishi hamda joriy yilning bahorida Qatardan delegatsiya kelib, Islom majmuasi uchun ajratilgan hududni ko‘zdan kechirishi ma’lum qilingan. Qatar nafaqat obyektni qurilish ishlarida qatnashadi, balki butun jarayonni nazorat qilishi qayd etilgan.

Qurilish rejasiga ko‘ra, 20 gektarli hududda jome’ masjidi, Islom universiteti, Musulmonlar diniy boshqarmasi, talabalar uchun yotoqxona, madaniy-ko‘ngilochar majmua, savdo va sport markazi qurilishi ko‘zda tutilgan.

O‘MI Matbuot xizmati