Duo qilish odoblari to‘g‘risida bilasizmi? 

Qur’oni karimda “Parvardigoringiz: “Menga duo qilingiz, Men sizlar uchun (duolaringizni) ijobat qilay!” – dedi. Albatta, Menga ibodat qilishda kibr qilgan kimsalar yaqinda tuban holatda jahannamga kirurlar” (G‘ofir, 60) deyilgan. 

Janob Payg‘ambarimiz (sollallohu alayhi va sallam) bunday marhamat qiladilar: “Biror musulmon Allohga duo qilsa, Undan ma’siyatni va qarindoshlik aloqasini uzishni (so‘ramasa), Alloh unga uch narsadan birini beradi. Yo duosi tezda ijobat bo‘ladi, yoki oxiratga zaxira qilib (saqlab) qo‘yadi. Yoxud duosi barobarida undan yomonlikni ketkazadi”. Sahobalar: “Unday bo‘lsa (duoni) ko‘paytiramiz”, deyishdi. Rasululloh (sollallohu alayhi va sallam): “Alloh (mukofotini) ham ko‘paytiradi”, dedilar (Imom Termiziy rivoyati). 

Duoning odoblari ushbulardir: 

• Ixlos. 
• Duoni boshlashda va oxirida Allohga hamdu sano aytib, Rasululloh (sollallohu alayhi va sallam)ga salavot aytish. 
• Qabul bo‘lishiga aniq ishonch bilan duo qilish. 
• Duoda davomli bo‘lish, umidsizlikka tushmaslik. 
• Qalbdan duo qilish. 
• Tanglikda ham, farovonlikda ham duoni tark qilmaslik. 
• Allohning O‘zidangina yordam so‘rash. 
• Jufti haloli, moli, farzandi yoki o‘zini yomon duo qilmaslik. 
• Iltijoli past ovozda hokisorlik ila so‘rash. 
• Duodan oldin gunohlarini tan olib, istig‘for aytish. Ne’matlarni e’tirof etib, uning uchun Allohga shukr qilish. 
• Duoda qofiyali so‘zlar ishlatmaslik. 
• Rag‘bat bilan va qo‘rquv bilan so‘rash. 
• (Birovning) haqini olgan bo‘lsa, egasiga qaytarib, tavba qilish. 
• So‘raganlarini uch bor takrorlash. 
• Qiblaga yuzlanib so‘rash. 
• Kaftini ochib, qo‘lini ko‘krak barobarida ko‘tarib, duo qilish. 
• Imkon qadar tahoratli bo‘lish. 
• Duoda baqir-chaqir qilib, haddidan oshmaslik. 
• O‘zidan boshlash. 
• Taomi, ichimligi, kiyimi haloldan bo‘lsin. 
• Gunoh qilishni so‘rab yoki qarindoshlik rishtasini uzishni so‘rab duo qilmaslik. 
• Yaxshilikka buyurish, yomonlikdan qaytarish ham duo ijobat bo‘lishiga sababdir. 
• Gunohlardan tiyilish. 

Hadisi sharifda: “Duo ibodatning iligidir”, deyilgan. Demak, biz duo qilish orqali savobga erishamiz va gunohlarimiz mag‘firat qilinadi. 

“So‘ragan edingiz” kitobi asosida tayyorlandi

O‘MI Matbuot xizmati